2019/20 йилги мавсум «Ювентус» учун деярли (боиси А Сериядаги ғалаба жамоа учун аллақачон катта натижа ҳисобланмайди) омадсиз кечди. Чемпионлар Лигасидаги муваффақиятсизликдан ташқари, Италия чемпионатида туринликларга «Интер» ҳам жиддий қаршилик кўрсатди.
Катта эҳтимол билан келаси мавсумда Турин клубининг узоқ йиллик гегемонлиги ниҳоясига етади ва Апеннин ярим оролининг навбатдаги чемпиони Антонио Контенинг «Интер»и бўлади. Бунга бир нечта сабаблар бор, қуйида шу ҳақида батафсил фикр юртилади.
Андреа Пирло тажрибасиз мураббий
«Ювентус» анча йиллардан бери Чемпионлар Лигасини ютишни орзиқиб кутмоқда. Ва буни тушунса бўлади. Аммо тажрибасиз Андреа Пирлонинг бош мураббий этиб тайинланиши ваҳима ва шошқолоқликдан бошқа ҳеч нарса эмас.
Ҳеч ким Пирлонинг ўтмишда буюк футболчи бўлганига шубҳа қилмайди: «Юве» усиз бу қадар кўп соврин қўлга киритмаган бўларди. Аммо ярим ҳимоячи нимагаки эришган бўлса, буларнинг барчаси фақат майдонда бўлган. Унинг резюмесида «Ювентус»нинг ёшлар таркиби билан тўққиз кунлик ишдан бошқа ҳеч нарса йўқ. Эндиликда эса у Криштиану Роналду даражасидаги супер юлдузларни «югуртириши» керак...
Беқарор жамоа
«Ювентус» Массимилиано Аллегрининг прагматик, аммо текширилган тактикасидан воз кечиши биланоқ, муаммоларга дуч кела бошлади.
Одатда миллий биринчиликдаги ғалабалардан кейин мураббий ўз вазифасидан озод этилавермайди, аммо қаторасига тўққизинчи скудетто ҳам Саррини жамоада олиб қололмади.
«Ювентус» раҳбарияти кутишдан чарчади. А Серияда исботлайдиган ҳеч нарса қолмаган, аммо Европада қилиниши керак бўлган ишлар талайгина. Бир вақтлар Роналду ҳам айнан Чемпионлар Лигаси учун харид қилинганди.
Пирло иккала фронтда ҳам муваффақиятга эришишга ҳаракат қилиши аниқ, аммо ҳеч шубҳа йўқки, асосий эътибор А Серияга эмас, балки Чемпионлар Лигасига қаратилади.
Антонио Конте
Антонио Конте – «кекса синьора» афсонаси эканлиги ҳеч кимга сир эмас. Бу ерда у ҳам футболчи, ҳам мураббий сифатида сон-саноқсиз совринларни қўлга киритган. Кўпчилик унинг «Интер» бош мураббийи этиб тайинланишини Туриндаги меросига путур етказади ва муваффақиятсизликка учрайди деб ҳисоблаганди.
Конте ҳозирда ғалаба қозонишга ҳар қачонгидан ҳам жиддий киришган. У «Ювентус»нинг лигадаги гегемонлигига тугатишига ваъда берди, аммо дастлабки уриниш муваффақиятсиз кечди. Мутахассис бундан шу даражада тушкунликка тушдики, ҳатто клубни тарк этмоқчи ҳам бўлди, аммо раҳбарият билан келишиб, бошлаган ишини охирига етказишга қарор қилди. У ўзи ишлаган барча жамоаларда чемпион бўлолган. Энди эса навбат «Интер»га!
«Интер»нинг трансфер бозоридаги муваффақиятлари
Европадаги ёрқин истеъдодлардан бири бўлган Ашраф Ҳакими Миланга кўчиб ўтди. Ёш ярим ҳимоячилар Николо Барелла ва Стефано Сенси таркибга қўшиб олинди. Бундан ташқари, клубга Александр Коларов келди, Алексис Санчеснинг трансфери сотиб олинди. Шунингдек, «Барса»га керак бўлмай қолган Артуро Видалнинг келиши кутилмоқда.
Авваллари Италияда айнан «Ювентус» битимларда усталиги билан ажралиб турарди. Аммо бу йили у ҳеч кимни ажаблантирмаяпти. Трансфер ойнаси ёпилишига эса ҳеч қанча қолмади.
Бошқа мақолалар:
- Торрес, Хави ва Неймар. Роналду ва Месси бўлмаганида сўнгги ўн йилликда «Олтин тўп»ни кимлар олган бўларди?
- Это’Oдан Ибрагимовичгача. Хосеп Гвардиола билан муроса қила олмаган футболчилар ҳақида
- Рамосдан Азаргача. Жозе Моуриньо билан муроса қилолмаган футболчилар ҳақида
- Моуриньо ва Гвардиола миллиардер, бошқалар эса миллионер. Сўнгги 10 йилликда топ-мураббийлар трансферлар учун қанча сарфлаган?
Изоҳ (0)