Давлат тест маркази ҳузурида янги илмий марказ ташкил этилади. У тест материалларини ишлаб чиқиш ва уларнинг сифатини аниқлаш билан шуғулланади

Ўзбекистон Вазирлар Маҳкамасининг «Тест тизимини такомиллаштиришга қаратилган қўшимча чора-тадбирлар тўғрисида»ги қарори қабул қилинди.

Қарор билган тестология ва педагогик ўлчовлар, чет тилидан малака ошириш курсларини ташкил этиш ҳамда соҳада етакчи халқаро ташкилотлар билан ҳамкорликни йўлга қўйиш, Марказий Осиёда тестология бўйича минтақавий илмий мактаб яратиш мақсадида Вазирлар Маҳкамаси ҳузуридаги Давлат тест маркази ҳузурида «Илмий-ўқув амалий маркази» давлат муассасаси ташкил этилди.

Илмий марказнинг асосий вазифалари этиб қуйидагилар белгиланди:

• тест материалларини ишлаб чиқиш ва уларнинг сифатини аниқлаш, тестология ва педагогик ўлчовлар соҳасидаги илмий-тадқиқот натижаларини нашр этиш;
• тест материалларини ишлаб чиқиш ва уларнинг сифатини аниқлаш бўйича мутахассислар — тестологларни тайёрлаш, бу борада маҳаллий ва халқаро олий таълим муассасалари билан ўзаро ҳамкорликни йўлга қўйиш;
• шартнома асосида қисқа ва узоқ муддатли тестология, педагогик ўлчовлар, чет тиллари бўйича тингловчиларнинг малакасини ошириш, диагностик тест синовларини ташкил этиш;
• тестология ва педагогик ўлчовлар соҳасида илмий изланиш олиб борувчи шахслар учун зарур шарт-шароитлар яратиш, хорижий тажрибани ўрганиш асосида миллий тизимни яратиш бўйича таклифлар ишлаб чиқиш;
• халқаро имтиҳон олувчи ташкилотлар билан ҳамкорликда имтиҳонларни ташкил этиш ва ўтказиш.

Илмий марказ фаолиятини молиялаштириш манбалари этиб қуйидагилар белгиланди:

• шартнома бўйича жисмоний ва юридик шахсларга хизматлар кўрсатишдан тушган маблағлар;
• юридик ва жисмоний шахсларнинг ҳомийлик хайриялари;
• қонун ҳужжатлари билан тақиқланмаган бошқа манбалар.

2020 йил 1 ноябрдан бошлаб ягона тариф сеткаси бўйича меҳнатга ҳақ тўлашнинг тасдиқланган разрядларига кўра ДТМ бошқарув ходимлари лавозим маошларини аниқлашда тариф коэффициентлари бир ярим баравар миқдорида қўлланади ҳамда бу билан боғлиқ қўшимча харажатлар ДТМ фаолиятини ривожлантириш жамғармаси маблағлари ҳисобидан қопланади.

Эслатиб ўтамиз, мазкур қарор лойиҳаси 2019 йилнинг ноябрида муҳокамага қўйилган эди. Унга кўра, ДТМ ходимларининг маоши икки ярим бараварга ошиши кутилаётганди.