Бухоро вилоятининг Қоракўл туманида жиноят содир қилиб, дастлабки суд терговидан яширинган ва қочган шахс Қашқадарё вилоятининг Қамаши туманида қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, 2020 йилнинг июль ойида Бухоро вилояти Экология ва атроф-муҳитни муҳофаза қилиш бошқармаси ходимлари томонидан Олот тумани ва Қашқадарё вилоятининг чегара массивларига туташ манзилларда рейд ўтказилган. Рейд давомида 30 ёшли қоракўллик Ж.Д.нинг ноқонуний тарзда икки бош кийик овлагани аниқланган.
«Қоракўл тумани ‘Мирзоқалъа’ МФЙ фуқароси Ж.Д. бу хатти-ҳаракати билан Жиноят кодексининг 202-моддаси 2- ва 3-қисмида (Ҳайвонот ёки ўсимлик дунёсидан фойдаланиш тартибини бузиш) кўрсатилган жиноятни содир этган. Мазкур жиноят иши 2020 йилнинг 5 август куни судда кўриб чиқилиши белгиланган. Бироқ айбланувчи тегишли тартибда хабардор қилинган бўлишига қарамасдан, сабабсиз судга келмаган. Шундан сўнг туман суди томонидан фуқаро Ж.Д.ни мажбурий тартибда суд мажлисига келтириш тўғрисида ажрим чиқарилган», — дейди Жиноят ишлари бўйича Қоракўл тумани суди раиси Жалол Садиров.
Фуқарони яшаш жойидан топиш имкони бўлмагач, 2020 йилнинг 27 август куни фуқаро Ж.Д.га нисбатан қидирув эълон қилиш тўғрисида ажрим чиқарилган.
Салкам икки ой давомида Қоракўл туман ИИБ тезкор вакиллари томонидан олиб борилган қидирув натижасида яшириниб юрган фуқаро Қашқадарё вилоятининг Қамаши туманидаги Қорабоғ қишлоғида қўлга олинган.
Ж.Д. Бухоро вилоятига олиб келинган ва 14 сентябрдан буён Қоракўл туман ИИБнинг вақтинчалик сақлаш ҳибсхонасида ушлаб турилибди.
Изоҳ (0)