Тошкент шаҳрида 18 сентябрь куни ёмғир ёғиши кутилаётганлиги сабабли Тошкент давлат юридик университети қошидаги академик лицейига ўқишга кириш учун ўтказиладиган тест синовлари 20 сентябрга қолдирилди. Бу ҳақда Адлия вазирлиги маълум қилди.
Хабар берилишича, 2020/2021-ўқув йилида Тошкент давлат юридик университети қошидаги академик лицейига ўқишга кириш учун ўтказиладиган тест синовлари 18 сентябрь куни икки сменада (1-смена 08:00 дан 11:00 гача, 2-смена 16:00 дан 19:00 гача) Олмазор туманидаги Талабалар шаҳарчаси сайилгоҳида бўлиб ўтиши керак эди.
Бироқ Тошкент шаҳрида 18 сентябрь куни ёмғир ёғиши кутилаётганлиги сабабли, тест синовлари 20 сентябрь кунига кўчирилди. Тест синовлари фақат бир сменада бўлиб ўтади ва соат 09:00 да бошланади.
Абитуриентлар тест синовларига белгиланган вақтдан камида 1 соат олдин етиб келиши керак. Тест синовларига кириш фақат бир жойдан — «Беруний» метро бекати олдидан амалга оширилади.
Эслатиб ўтамиз, Ўзбекистон ОТМларига кириш имтиҳонларига иситмаси баландлиги сабабли киритилмаган абитуриентлар учун тест синовлари 17 сентябрь куни ўтказилди.
Изоҳ (0)