Мадриднинг «Реал» клуби аъзоси Гарет Бэйл фаолиятини яна Англияда давом эттиради. Бу ҳақда италиялик таниқли спорт журналисти Фабрицио Романо хабар берди.
«Реал» ва «Тоттенҳэм» футболчининг ижара шартномаси борасида келишувга эришган. Бэйл 18 сентябрь, жума куни тиббий кўрикдан ўтиш учун Лондонга йўл олади. Шундан сўнг футболчи трансфери эълон қилиниши кутилмоқда.
31 ёшли Гарет келишувга кўра, 2020/21 йилги мавсумни «Тоттенҳэм» сафида ўтказади. Уэльслик футболчи «шпорлар» шарафини 2007—2013 йиллар давомида ҳимоя қилган, шундан сўнг «Реал»га йўл олганди. 2013 йилда мадридликлар Бэйл учун Лондон клубига 101 миллион евро тўлаган эди.
Маълумот учун, Гарет «Реал» сафида ҳозирга қадар 251 та ўйинда қатнашиб, 105 та гол урди ва 68 та голли узатмани амалга оширди. Transfermarkt портали Бэйлни 28 миллион еврога баҳоламоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)