Ўзбекистон Ҳисоб палатаси раисига янги ўринбосарлар тайинланди

Ўзбекистон Ҳисоб палатаси раисига икки нафар янги ўринбосар тайинланди. Бу ҳақда палата томонидан хабар берилди.

Ўзбекистон Президентининг 2020 йил 15 сентябрдаги фармони билан Баҳодир Туробов Ҳисоб палатаси раисининг биринчи ўринбосари лавозимига тайинланди.

Баҳодир Туробов 1972 йил Сурхондарё вилоятида туғилган. У 1994 йил Тошкент молия институтини иқтисодчи мутахассислиги, 2000 йил Банк-молия академиясини молия мутахассислиги бўйича тамомлаган. 2007 йилда иқтисод фанлари номзоди илмий даражасини олган.

Баҳодир Турабов 2011—2015 йилларда Молия вазирлиги бошқарма бошлиғи, бош бошқарма бошлиғи вазифасида меҳнат қилган. У 2015—2017 йилларда «Ўзпахтасаноатэкспорт» холдинг компанияси бош бошқарма бошлиғи лавозимида фаолият олиб борган. 2017—2018 йилларда Ҳисоб палатаси бош инспектори, шўъба мудири сифатида меҳнат қилган. 2018—2019 йилларда Давлат солиқ қўмитасида раис ўринбосари вазифасида ишлаган. 2019 йил сентябрдан мазкур тайинловга қадар Ҳисоб палатаси раиси ўринбосари лавозимида ишлаб келган.

Шунингдек, Президентининг юқорида қайд этилган фармони билан Саидлазиз Саидкаримов Ҳисоб палатаси раиси ўринбосари лавозимига тайинланди.

Саидлазиз Саидкаримов 1982 йил Тошкент вилоятида туғилган. У 2002 йил Ўзбекистон Миллий университетини ҳуқуқшунослик мутахассислиги бўйича тамомлаган. Саидлазиз Саидкаримов 2002—2009 йилларда Сирдарё вилояти прокуратураси тизимида турли вазифаларда ишлаган. 2009—2018 йилларда Ўзбекистон Бош прокуратурасининг бошқарма прокурори, катта прокурори, бошқарма бошлиғи ўринбосари, бошқарма бошлиғи лавозимларида фаолият олиб борган. 2018 йил февралдан мазкур тайинловга қадар Ўзбекистон Бош прокурорининг ўринбосари лавозимида ишлаб келган.

Аввалроқ Ўзбекистон Ҳисоб палатаси шуъба мудири Ҳикматилло Латипов Андижон вилояти Жалақудуқ туманига ҳоким этиб тайинланганди.