Ўзбекистон аэропортларида, темир йўл станцияларида ва чегара пунктларида шахслар ва транспорт воситаларининг ҳаракатланишига рухсат берилаётганлиги муносабати билан халқаро туризмни ташкил этишга нисбатан қўлланилган чекловлар 1 октябрдан бошлаб бекор қилинади.
Мавзуга доир: Ўзбекистон 1 октябрдан бошлаб барча халқаро авиа, темир йўл ва автойўл қатновларини тиклайди
Шу билан бирга, туризмни ривожлантириш учун зарур шарт-шароитларни яратиш мақсадида туристик компанияларга туристларни олиб келиш билан боғлиқ енгилликлар тақдим этилмоқда.
Ўзбекистонга хорижий давлатлар фуқаролари бўлган туристларни олиб келиш билан шуғулланаётган туристик фирмалар улар томонидан Ўзбекистонга туристик гуруҳ сифатида ташкил этилаётган саёҳатларни амалга оширишдан аввал туристларни ПЗР тест текширувидан ўтказилишини таъминлаши лозим. Бунда туристик гуруҳ таркиби 5 кишидан кам ва 15 кишидан ортиқ бўлмаслиги ва туристлар турли касалликлар, жумладан, COVID-19’ни қамраб оладиган тўлиқ суғуртага эга бўлиши шарт.
Бунда ПЗР тест текшируви натижаси манфий бўлган туристларга нисбатан 14 кунлик карантинда сақлаш бўйича чеклов қўлланилмайди, улар Ўзбекистонга киришда коронавирусга текширилмайди.
Турист Ўзбекистонга кириб келган вақтда унда коронавирус аломатлари бўлса, у ўтказиш пунктида ўз ҳисобидан коронавирусга ПЗР ёки экспресс-тест ёхуд антиген текширувидан ўтиши лозим.
Тест мусбат чиқса, сайёҳ ўз ҳисобидан карантинга олиниб, даволанишдан ўтади ёки ўз мамлакатига қайтади.
Хорижий туристлар Ўзбекистонда мавжуд карантин чекловлари ва санитария талабларига қатъий риоя этган ҳолда ҳаракатланишлари лозим. Бу борадаги талаблар бажарилиши туристик фирмалар зиммасига юклатилади.
Эслатиб ўтамиз, «Ўзбекистон — хавфсиз саёҳат кафолатланган» санитария-эпидемиология тизими доирасида Ўзбекистонда коронавирусга чалинган туристларга 3000 минг доллар миқдорида компенсация тўланиши маълум қилинганди.
Изоҳ (0)