40 ёшдаги дебют, саратон устидан қозонилган ғалаба: «Муҳташам юз йил» ва «Зулейҳа»даги актриса Ваҳиде Гердюм ҳақида нималарни биламиз?

«Муҳташам юз йил» сериалининг тўртинчи фаслида Марям Узерли ижро қилган Хуррам ролини давом эттирган Ваҳиде Гердюм ҳақида маълумот бериб ўтамиз.

Лойиҳага қўшилганида 48 ёш бўлган актриса мухлислар томонидан унчалик илиқ қабул қилинмаган. Марямга ўрганиб қолган телетомошабинлар сериалга эски Хуррамни қайтиши кераклигини таъкидлай бошлаган. Бундай салбий муносабатларга нисбатан Ваҳиде оғир-босиқ ҳолда ёндашган ва ўзини 29 ёшли гўзал Марям эмаслигини, Узерлининг ёшида унинг ҳам ўзига яраша чиройи бўлгани ва қолаверса, фильмда у катта ёшдаги Хуррамни гавдалантирганини билдирган. Аммо у рол ижро қилган янги қисмлар эфирга узатилганидан кейин мухлислар Гердюмнинг ижро маҳоратини тан ола бошлаган. Сериалда суратга тушган вақтида унинг кинодаги тажрибаси унчалик кўп бўлмаганига қарамай, танқидчи ва телеекспертлар Ваҳидени энг яхши театр актрисаларидан бири эканлигини эътироф этган.

Актриса 1965 йил 13 июнда Измирда дунёга келган. Отаси юк машина ҳайдовчиси, онаси эса уй бекаси бўлган. Мактабни тамомлаганидан кейин бўлажак актриса тасвирий санъат, кейинроқ эса иқтисод бўйича таълим олган. Аввалига Измир театрида рол ижро қилган Ваҳиде кейинчалик Анқара ва Аданадаги театрларда ишлаган.

Узоқ йиллар давомида у дунё классик песаларида рол ижро қилган. 2007 йилда «Йилнинг энг яхши театр актрисаси» деб топилган Ваҳиде «Олтин апелсин» фестивалида «Биринчи севги» фильмида бош қаҳрамонни гавдалантиргани учун энг яхши актриса деб топилган. «Ишқ эртаги» фильми унинг кинодаги дебюти бўлган ва у вақтда Ваҳиде 40 ёшда эди. Шундан кейин «Янги йил билан, Лондон!», «Менинг онам», «Инқилоб машинаси», «Зефир» фильмларида суратга тушган.

«Муҳташам юз йил» сериалида суратга тушиш таклиф қилинганида у дарҳол розилик бермаган. Бу вақтда Марям Узерли ҳомиладорлиги сабаб лойиҳани тарк этиб, даволаниш учун Германияга жўнаб кетган. Ваҳиде у билан бир неча маротаба боғланишга қарор қилган, аммо у телефонини кўтармаган. Узерлининг отаси телефон қўнғироқларидан бирига уларни бошқа безовта қилмасликларини айтган жавобидан кейин Гердюм лойиҳада иштирок этишга розилик берган. Сериалда Ваҳиденинг Гердюм фамиляси ёзилган бўлган, аммо 22 йиллик турмушидан кейин 2013 йилда эри билан муносабатларига нуқта қўйган ва Перчин фамилясига қайтган. У «Муҳташам юз йил»да эпизодик роллардан бири Бекир оға ролини ижро қилган Алтан Гердюм билан оила қурган эди. Ажрашишларига қарамасдан собиқ жуфтлик дўстона муносабатларда бўлган. 2011 йилда актрисага сут бези саратони ташхиси қўйилган ва касаллик билан курашиш учун ижодида танаффус эълон қилган. Бу вақтда собиқ турмуш ўртоғи уни қўллаб-қувватлаган.

Аввалига мамлакатининг ўзида машҳур бўлган актриса «Муҳташам юз йил»дан кейин дунёга танилган. Шунингдек, япон фильми мотиви асосида суратга олинган «Она» сериалидаги роли ҳам унга муваффақият олиб келган. Актриса театр ва кинода суратга тушишдан ташқари эндигина фаолиятини бошлаганларга актёрлик маҳоратидан дарс беради. «Она» сериалидаги ролидан кейин у «Бир куни Чукуровада» сериали ва «Эшик» фильмида суратга тушган.