Motorola эгилувчан экранга эга иккинчи смартфонини тақдим этди

Motorola компанияси эгилувчан экранга эга ўзининг иккинчи смартфони — Razr 5G’ни тақдим этди, деб ёзади GSMArena. Номидан билиш мумкинки, смартфон бешинча авлод алоқа тармоғини қўллаб-қувватлайди.

Йиғилган ҳолатдаги Motorola Razr pOLED-экранининг диагонали 6,2 дюймга, пикселлар сони эса 2142х876га тенг. Ташқи gOLED-дисплей диагонали эса 2,7 дюймни (800х600 пиксел) ташкил этгани сабаб унинг ёрдамида нафақат оддий маълумотларни ёзиш, балки тўлақонли иловаларни ишга тушириш ҳам мумкин.

Қурилма ишлашига Snapdragon 765G процессори ва 8 гигабайт тезкор хотира жавоб беради. Ички хотираси эса 256 гигабайтни ташкил этади. Биринчи авлод билан таққослаганда яна бир муҳим ўзгариш — аккумулятор сиғимининг ортгани: 15 ваттли тезкор қувватланишга эга 2800 мА/соат. Суратларни иккита камера ёрдамида олиш мумкин: 48 мегапикселли асосий камера ва 20 мегапикселли фронтал.

Motorola Razr 5G АҚШ ва Европада кузда сотувга чиқади. Расмий нархи — 1399 доллар.

Эслатиб ўтамиз, апрель ойида Motorola Galaxy S20 Ultra каби техник тавсифга эга, бироқ ундан 400 долларга арзонроқ Edge флагманини тақдим этганди.