Тошкент қишлоқ хўжалиги техникаси заводининг иш жараёни (фото)

Ўзбекистон Президенти Шавкат Мирзиёевнинг ташаббуси билан 2020 йил 14 январда Ўзбекистон Республикаси Вазирлар Маҳкамасининг «Республика ҳудудларида пахта ҳосили теримини механизациялаш даражасини ошириш чора-тадбирлари тўғрисида» ги 21-сон қарори қабул қилинган. Қарордан кўзланган асосий мақсад замонавий пахта териш машиналарини ишлаб чиқариш ва теримни машинада ташкил этиш ҳисобига пахта теримини механизациялаш даражасини оширишдан иборат.

Унинг ижросини таъминлаш мақсадида «Тошкент қишлоқ хўжалиги техникаси заводи» АЖ томонидан 2020 йил пахта мавсумига 850 дона замонавий, юқори самарали пахта териш машиналарини ишлаб чиқариб, республика ҳудудларига етказиб бериш режалаштирилган эди.

Оммавий ахборот воситалари вакиллари айни жараён билан танишиш учун заводга ташкил этилган пресс-турда иштирок этишди. Завод мутахассислари пахта териш машинаси тайёр бўлгунича ўтадиган 5-6 хил жараёнлар билан журналистларни таништирди.

Маълум қилинганидек, машиналар тайёрлаш жараёнида, дастлаб механик тайёрлов цехида деталлар, яъни тунука қисмлари 0,8 ммдан 35 мм листларгача кесилади. Сўнг станокларда букилиб керакли шакл берилади. Учинчи босқичда пайвандланиб, ҳар хил тугунлар ясалади, зангламаслиги учун галваник қоплама ва синкдан фойдаланилади. Бўялганидан сўнг йиғиш босқичига ўтказилади. Шунингдек, замонавий цехларда ишлов берилган қисмлар заводга олиб келинади, тугунларга пайвандланади.

2020 йил ҳисобидан завод томонидан фермер хўжаликларига 100 дона машина синов учун ишлаб чиқариб берилган. Ҳозирги кунда заводда 120-150 та трактор йиғилган.

«Ўзавтосаноат» томонидан Тошкент қишлоқ хўжалиги техникаси заводидаги ишлаб чиқариш ва корпоратив бошқарувни оптимизациялаш бўйича қатор стратегиялар ва дастурлар ишлаб чиқилган, уларни амалга ошириш учун корхонага автомобилсозлик тармоғидан 200 нафар мутахассис жўнатилган. Қабул қилинган дастурлар доирасида корхонада ахборот тизимлари, бошқарув, ҳисоб-китоб ва сифат назорати тизимлари татбиқ этилган. Технологик жараён, ички логистика ва менежментнинг тубдан ўзгариши сабабли, ўтган икки ой давомда салмоқли натижаларга эришишга муваффақ бўлинди – ишлаб чиқариш ҳажми кунига 5 дона техникадан 40 тагача ўсди.

Заводдаги бошқарув ва ишлаб чиқариш жараёнларини такомиллаштириш йил охирига бориб ишлаб чиқариш қувватларини 80 фоизгача ишга солиш имконини бериши таъкидланмоқда.