Самарқанд шаҳар ИИБ масъули: «Хотинига памперс едирган эр ярашиш билан қутулолмайди»

Самарқандда хотинига зўравонлик қилиб, унга памперс едирган фуқаро Ш.К.га нисбатан қўлланилган қамоқ эҳтиёт чораси ўзгартирилмаган. Жиноят-процессуал кодекси талабларига кўра, ушбу жиноят ишини яраштириш билан ҳам тугатиб бўлмайди. Бу ҳақда Самарқанд шаҳри бўйича ИИО ФМБ Тергов бўлими бошлиғи подполковник Дамир Султонов мазкур масалага бағишланган брифингда маълум қилди, дея хабар берди «Дарё» мухбири Фарҳод Норбўтаев.

Брифингда сўз олган Дамир Султоновнинг таъкидлашича, хотинига зўравонлик қилган эрга Жиноят кодексининг 105-моддаси 2-қисми «г» банди (Қасддан баданга ўта шафқатсизлик билан ўртача оғир шикаст етказиш) билан жиноят иши қўзғатилиб, дастлабки тергов ҳаракатлари олиб борилмоқда.

«22 август куни ижтимоий тармоқларда тарқалган ушбу ҳолатдан бугун кўпчилик яхши хабардор. Хотинига нисбатан шафқатсиз муносабатда бўлган Ш.К. 2020 йил 24 август куни ушланиб, суд қарори билан унга нисбатан қамоққа олиш эҳтиёт чораси қўлланилган. Ижтимоий тармоқларда бу шахс қамоқдан қўйиб юборилибди, эр-хотинни яраштириш чораси кўрилар экан, деган гап-сўзлар тарқалмоқда. Аммо бу гаплар асоссиз. Ш.К.га нисбатан қўлланилган қамоқ эҳтиёт чораси ўзгартирилмаган. Жиноят-процессуал кодекси талабларига кўра, ушбу жиноят ишини яраштириш билан ҳам тугатиш имконсиз», — деди Дамир Султонов.

Подполковник Дамир Султонов айбдор жазосиз қолмаслигини қўшимча қилди.

«Ижтимоий тармоқларда тарқалган фикрларга жавобан шуни айтмоқчиманки, биз жиноят ишини дастлабки тўпланган терговолди ҳужжатларига асосан 105-модда (қасддан баданга ўртача оғир шикаст этказиш) билан қўзғатганмиз. Ҳозирда жабрланувчи ва гумон қилинувчини, гувоҳларни сўроқ қиляпмиз. Экспертиза хулосалари олинган. Барча кўрсатма ва важлар текширилмоқда. Иш бўйича аниқланган ҳолатларнинг ҳеч бири эътибордан четда қолмайди. Бу жиноят ишига қўшиб борилади. Айни пайтда иш тергов жараёнида бўлгани, тергов сири деган тушунчалар борлиги сабабли барча ҳолатларни ошкор эта олмаймиз», — деди Дамир Султонов.

Эслатиб ўтамиз, мазкур воқеа жамоатчиликка маълум бўлгач, Самарқанд шаҳар ҳокимлиги эри хўрлаган ва мажбурлаб памперс едирган аёлни яраштирмоқчи эканлигини айтди. Сенат эса ҳолатни назоратга олганини билдирди.