Тошкент вилоятида фуқарони ўз автомобилида Зангиота–Чилонзор йўналишида кира қилиши учун ундан 500 АҚШ доллари талаб қилган икки фирибгар далилий ашё билан ушланди, дея хабар бермоқда вилоят ИИББ.
Қайд этилишича, 2020 йилнинг 5 сентябрь куни фуқаро Ф.М. вилоят ИИББга ариза билан мурожаат қилиб, шахсий Damas автомашинасида қонунда белгиланган тартибда давлат божлари ва бошқа тўловларни тўлаб, Зангиота–Чилонзор йўналиши бўйлаб кира қилиш мақсадида ишга чиқмоқчи бўлганида унга ўзини Нодир ва Носир деб таништирган номаълум шахслар бу йўналишда ишлаши учун ундан 500 АҚШ доллари талаб қилганини маълум қилган.
Бунинг эвазига икки шахс Ф.М.нинг ҳаракатланиш вақтида ҳеч қандай муаммога дуч келмаслигини айтган. Мурожаат қилувчи ушбу шахсларга нисбатан қонуний чора кўришни сўраган.
ИИББ ЖҚБ ходимлари томонидан 7 сентябрь куни Зангиота туманида ўтказилган тезкор тадбир давомида 31 ёшли Н.С. ва 24 ёшли Н.М. аризачи Ф.М. дан келишилган пулларнинг 400 АҚШ долларини олаётган вақтида холислар иштирокида далилий ашё билан ушланган.
Тадбир давомида фуқаро Н.С. холислар иштирокида текширилганда унинг ёнидан оғирлиги (экспертиза хулосасига асосан) 50 грамм бўлган гиёҳвандлик моддаси борлиги аниқланиб, далилий ашё сифатида олинган.
Мазкур ҳолат юзасидан Зангиота тумани ИИБ томонидан фуқаро Н.С. га нисбатан Жиноят кодексининг 168- моддаси (фирибгарлик) ва 276-моддаси (гиёҳвандлик воситаларини ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан, фуқаро Н.М. га нисбатан 168-модда (фирибгарлик) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Мавзуга доир:
Изоҳ (0)