Алексей Навальнийнинг заҳарланиши бўйича Беларусь билиб олган Варшава ва Берлин суҳбатида немис ва поляклар эмас, америкаликлар иштирок этган. Meduza’нинг хабар беришича, бу ҳақда Александр Лукашенко Россия ОАВларига берган интервьюсида айтди.
Унинг сўзларига кўра, суҳбатнинг тўлиқ ёзувини Федерал хавфсизлик хизмати раҳбари Бортниковга топширган. «Бизда унинг нусхаси қолди, оригинали йўқ. Ушбу овознинг инглиз тилидаги ҳақиқий нусхаси. Мутахассисларнинг айтишича, суҳбатлашаётганлар немис ва поляклар эмас, америкаликлар. Чунки америкаликлар инглиз тилини барибир бошқача талаффуз қилади», — деган Лукашенко.
У тутиб олинган суҳбат аудиоси энди Федерал хавфсизлик хизматига ўтгани учун унинг тўлиқ шаклини ошкор этишдан бош тортган. Лекин шу билан бирга, «бу ҳали гул эканлиги, тез орада мевасини кўрсатишини» таъкидлаган.
Беларусь президенти Александр Лукашенко 3 сентябрь куни Россия бош вазири Михаил Мишустин билан бўлиб ўтган учрашуви вақтида Беларусь разведкаси Германия ва Польша ўртасида бўлиб ўтган суҳбатни ёзиб олишга муваффақ бўлгани, Унда Навальнийнинг заҳарланмагани айтилганини маълум қилганди.
Эслатиб ўтамиз, 2 сентябрь куни Германия ҳукумати Навальний Россияда «Новичок»га ўхшаш модда билан заҳарланганини маълум қилган. Сиёсатчи даволанаётган «Шарите» клиникаси шифокорларининг сўровига биноан ўтказилган тестлар натижаларидан шундай хулосага келинган.
Германия канцлери Ангела Меркель Россия ҳукумати Навальний заҳарланиши билан боғлиқ жиддий саволларга жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона иш» деб атади. Вашингтон айбдорларга нисбатан молиявий чекловлар қўллашга ваъда берди.
Изоҳ (0)