Ироқдаги АҚШ ҳарбийлари контингентининг сони учдан бирга қисқаради

АҚШ сентябрь охирига қадар Ироқдаги ҳарбийлар контингентининг учдан бир қисмини қисқартиради. Бу ҳақда АҚШ марказий қўмондонлиги (CЕНТCОМ) раҳбари, генерал Кеннет Маккензи маълум қилди.

У журналистлар билан суҳбатда 5,2 минг нафар бўлган ҳарбийлар сони 3 минггача қисқаришини билдирган, дея хабар берди BBC.

Маккензининг сўзларига кўра, ҳудудда қоладиган ҳарбийлар Ироқ хавфсизлик кучларига ИШИД жангариларининг ўчоқларини йўқ қилишда кўмак беради.

Аввал АҚШ администрацияси вакили журналистлар билан мулоқот вақтида Ироқдаги америкалик ҳарбийлар сони қисқартирилишини айтиб ўтганди. Шунингдек, у яқин вақт ичида Афғонистондаги АҚШ ҳарбийларининг муайян қисми ҳам мамлакатдан чиқарилиши мумкинлигини қўшимча қилган.Эслатиб ўтамиз, 2020 йилнинг январь ойида Ироқ барча хорижлик ҳарбийларнинг ўз ҳудудидан чиқиб кетишини талаб қилган, АҚШ эса бунга жавобан Эрон генерали Қосим Сулаймонийни Бағдодда ўлдирган. Ушбу воқеадан кейин АҚШ давлат департаменти Ироқдан ҳарбийларни олиб чиқиб кетиш режалаштирилмаганини, Дональд Трамп эса ўз қўшини чиқиб кетадиган бўлса Ироқ ҳукумати мамлакатдаги ҳарбий базалар, элчихоналар қурилишига сарфланган пулларни қайтариши лозимлигини қайд этган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.