АҚШнинг космосдаги ҳаракатлар учун мўлжалланган Космик кучлари тузилишига Россия ва Хитойда худди шундай кучлар тайёрланаётгани сабаб бўлган. Бу ҳақда АҚШ президенти Дональд Трамп Шимолий Каролина штатида ўз тарафдорлари олдида қилган чиқиши чоғида маълум қилган, деб ёзмоқда «РБК».
«Мен Россия нима қилаётганини, Хитой нима қилаётганини кўрдим. Биз ҳам шундай иш қилишимиз кераклигини айтдим. Бу осон бўлган, деб ўйларсиз, осон бўлмади — қийин бўлди», — дея таъкидлади президент.
Трамп АҚШ Космик кучларини ўз президентлиги даврида 2016 йилдаги сайлов кампаниясида берган ваъдасидан кўра кўпроқ иш қилганига мисол сифатида эслаб ўтган. «Мен Космик кучлар ҳақида гапирганимни ҳеч қачон эшитмагансиз. Биз АҚШ Қуролли кучларининг янги турини яратдик», — деди Трамп.
АҚШ президенти космик кучлар бўлинмаси тузилиши ҳақида 2018 йилнинг ёзида маълум қилган. 2019 йилнинг декабрида эса у АҚШ Космик кучлари тузилишини ҳақида расман эълон қилган. 2020 йил учун умумий қиймати 738 миллиард долларни ташкил қиладиган АҚШ мудофаа бюджетидан космик қўшинларга 40 миллион доллар ажратилган. Қўшиннинг дастлабки таркиби ўз ичига 200 кишини олган.
Трамп космосни ҳарбий ҳаракатларнинг кейинги майдони, деб атаган ва АҚШ Космик кучларидан ҳужум мақсадларида фойдаланиш мумкинлигини тан олган. «Космик кучлар мудофаамизнинг муҳим қисми, очиғини айтаман, бизнинг ҳужум имкониятларимиз бўлади», — дея таъкидлаган АҚШ президенти.
2020 йил ёзининг бошида Пентагон космосдаги мудофаа стратегиясини тақдим этди. АҚШ мудофаа вазирлигининг маълум қилишича, стратегия АҚШ ва унинг иттифоқчилари ҳарбий самарадорлигини пасайтириш учун «космосни қуроллантирган» Россия ва Хитой томонидан бўладиган жиддий таҳдидга жавоб сифатида тайёрланган.
Ўз навбатида, Россия президенти Владимир Путин айнан Вашингтон космосни ҳарбий ҳаракатлар театри сифатида кўраётганини, Москва эса уни ҳарбийлаштиришга қарши чиқаётганини айтган.
Изоҳ (0)