Ўзбекистонда хизмат кўрсатган артист, «Меҳнат шуҳрати» ордени соҳиби Турғун Бекназаров MY5 телеканалининг «Омон-омон» дастурида 63 ёшида иккинчи бор уйланиб, ўғил фарзанд кўргани ҳақида сўзлаб берди.
«Турмуш ўртоғим 57 ёшида оламдан ўтди. Бир ярим йилдан сўнг, 2017 йилда қариндошлар йиғилиб, мени уйлантириб қўйди. Рафиқам асли чустлик, қизим билан бирга ишлайди. Наманганда ҳам катта тўй қилдик. 63 ёшимда ўғил фарзанд кўрдим, исмини Саидакбар деб қўйдик», — дейди актёр.
«Шу ёшда кўрган фарзанд бошқача бўларкан. Ҳали икки ёшга кирмаган бола телефонимни олиб, YouTube’га киради. Жуда ақлли. Қўни-қўшниларнинг болалари билан яхши чиқишади. Катта бўлса, ошна-оғайниси кўп, хушчақчақ бола бўлади, шекилли», — дея сўзларини давом эттиради Турғун Бекназаров.
Маълумот учун, Турғун Бекназаров 1 май 1956 йил Қашқадарё вилояти Яккабоғ туманида таваллуд топган. 1978 йили Тошкент театр ва рассомлик санъати институтини битирган.
1997 йили «Ўзбекистонда хизмат кўрсатган артист» фахрий унвони, 2012 йили «Меҳнат шуҳрати» ордени билан мукофотланган.
1977 йилдан буён Муқимий театрида ишлайди.
Изоҳ (0)