Ўзбекистон маданият вазири «Мендирман Жалолиддин» сериалининг суратга олиш жараёнлари билан танишиш учун Туркияга борди. Бу ҳақда унинг Instagram’даги саҳифасида маълум қилинди.
Хабарингиз бор, маданият вазирлиги буюртмасига биноан турк кино ижодкорлари билан ҳамкорликда ‘Мендирман Жалолиддин’ сериали суратга олинмоқда. Ушбу тарихий фильмга маҳоратли актёр ва актрисалар жалб этилган.Айни дам мазкур фильмнинг суратга олиниш жараёнлари ва ташкилий масалалар билан танишиш мақсадида Туркияда ижодий сафарда бўлиб турибмиз. Ташрифимизнинг илк куниёқ «Бўздағ фильм» раҳбари Меҳмед Бўздағ билан учрашдик.
Мулоқот чоғида ушбу фильм туркий халқлар тарихидан сўзловчи, унинг маданияти, инсонийлиги каби фазилатларини намоён эта олувчи дурдона асар сифатида нафақат туркий миллатлар, балки, бутун дунё халқларига туҳфа эта олишимиз зарурлиги таъкидланди. Жалолиддин Мангуберди образи жуда нозик ва уни гавдалантиришда юксак маҳорат билан бирга ўта ҳушёр бўлиш, уни увол қилиб қўймаслик кераклиги ҳам айтиб ўтилди. Чунки мазкур фильм ҳар бир томошабинда ватанпарварлик ва ғурур туйғусини шакллантириб, эл-юрт озодлиги йўлида миллий бирликка, юрт раҳнамоси ёнида жипслашишга ундайди. Юртдошларимиз ҳам ушбу фильмни шубҳасиз интиқлик билан кутаяпти. Ундан умидимиз катта.
Озодбек Назарбеков, Ўзбекистон маданият вазири
Эслатиб ўтамиз, сериалда бош қаҳрамон Жалолиддин Мангуберди ролини турк актёри Эмре Кивилжим ижро этади. Шунингдек, бир қатор ўзбекистонлик актёр ва актрисалар Тоҳир Саидов, Жавоҳир Зокиров, Акбархўжа Расулов, Саида Раметова, Райҳон Уласенова, Раъно Шодиева, Феруза Норматова, Юлдуз Ражабоваларнинг ҳам рол ижро этиши кутилмоқда.
Сериалнинг илк мавсуми 13 қисмдан иборат.
Изоҳ (0)