Қашқадарё вилоятининг Деҳқонобод туманидаги «Ойдин йўл» маҳалласида яшовчи фуқаро Норгул Беккамова мутасадди ташкилотларга мурожаат қилиб, туман ҳокимлиги унга ёрдам бермаётганини, аҳволи оғирлигини маълум қилган. Бу ҳақда хабар қилган туман ҳокимлиги ахборот хизматининг ёзишича, фуқаро ҳокимдан 35 миллион сўм қарзини тўлаб беришни талаб қилган.

Фото: Деҳқонобод туман ҳокимлиги

Таъкидланишича, фуқаро мурожаатини 6 сентябрь куни туман ҳокими Зоир Алиқуловнинг шахсан ўзи ўрганган.

Маълум бўлишича, фуқаро танишлари ҳамда қўни-қўшниларидан 35 миллион сўм қарз олиб, эҳтиёжи учун сарфлаб юборган. Ҳоким Зоир Алиқулов билан мулоқоти давомида фуқаро қарз олган одамлари уни тинч қўймаётганини, пулини сўраб келаётгани боис уйини сотишга мажбурлигини айтиб, 35 миллион сўм қарзини ҳокимлик тўлаб беришини талаб қилган.

«Туман ҳокими Зоир Алиқулов фуқарога яшаб турган уйини сотса, ўзи уйсиз қолишини айтиб, ҳокимлик томонидан таъмирлаб берилган уйни сотишга тақиқ қўйишини маълум қилди», — дейилади ҳокимлик ахборот хизмати хабарида.

Бунга жавобан эса фуқаро ҳокимга унинг уйини сотиш ишига аралашмаслигини, уйини сотиш-сотмаслик ўзининг хоҳиши эканлигини айтиб, 35 миллион қарзи тўлаб берилишини талаб қилган.

Туман ҳокимлигининг эслатишича, фуқаронинг аввалги мурожаатларига жавобан ҳокимлик томонидан кўп маротаба ёрдам берилган. Жумладан уйининг таъмири ва фарзандларининг хатна тўйи учун пластик карточкасига маблағ ўтказиб берилган. Турмуш ўртоғи билан яшаса-да, доимий равишда озиқ-овқат маҳсулотлари билан таъминланган. Шунингдек, эҳтиёжманд оилалар учун мўлжалланган 1 миллион сўмлик ва 14 ёшга тўлмаган ҳар бир фарзанди учун 220 минг сўмлик ёрдам пуллари ҳам берилган.

Деҳқонобод туман ҳокимлиги томонидан ижтимоий тармоқларга жойланган ушбу муносабат тармоқ фойдаланувчилари орасида кўплаб муҳокамаларга сабаб бўлди.

Фото: Скриншот

Ғайрат Баратов исмли Facebook фойдаланувчиси «Телевизорга чиқиб олиб, мана Андижонда фалончига уй бердик, фалончига бепул машина совға қилдик дея реклама қилавергач, мана шунақа боқимандалар кўпайиб кетди» дея аёлнинг ҳаракатини қораласа, Шокир Ҳасанов исмли фойдаланувчи «Нима бўлганда ҳам аёл ўзи ва болаларининг ҳаққини сўраяпти, сиз ва бизнинг ҳаққимизни ёки бўлмасам ҳокимнинг еб турган нонини сўрамагандир. Шу аёл ҳам Ўзбекистон фуқаросидир. Не-не коррупциячилар еса майли-ю, бир камбағал пул сўраса, шунча талаяпсизларми? Сизлар ҳам сўранг. Бекорга ҳам ўғри каззоблар еб ётибди деб юртбошининг ўзи айтиб турибди-ю», дея аёлнинг ёнини олади.

Деҳқонобод ҳокимлигининг мазкур хабари ҳали-ҳамон муҳокамалар марказида бўлиб турибди.

Мавзуга доир: