Оёқ кийим зерикарли образга ўзига хослик бахш этиши ёки аксинча нотўғри танланса, дидсиз кўринишга сабабчи бўлиши мумкин. Пойабзални кўйлакка мослашда эътиборга олиниши керак бўлган жиҳатларга тўхталиб ўтамиз.
Жиддий услубдаги либос билан
Одатда дресс-код билан ёпиқ ва пошнаси унча баланд бўлмаган пойабзал кийилади. Бу борада Жаклин Кеннедининг кийиниш услубидан илҳомланиш мумкин. Замонавий хонимлардан эса Мишель Обама ва Тереза Мейдан ғоя олса бўлади. Танловни ёрқин бўлмаган ранглар — қора, қаймоқ ранг, кул рангга қаратиш тавсия этилади.
Аёлликка урғу берадиган кўйлак
Латофатли кўрсатадиган либос ва кўйлаклар билан бир қанча оёқ кийимлари мосласа бўлади, айниқса пошнаси баланд босоножкалар билан образ янада чиройли кўринади. Ёки боғич ва камарлари кўп бўлган сандаллар ҳам яхши вариант. Аммо балетка кийиш тавсия қилинмайди. Айни вақтда актуал бўлмаган балеткалар билан образингиз зерикарли ва эскича кўриниши мумкин.
Оқшом либослари
Узун оқшом либоси билан учли, пошнаси бор туфли кийинг. Хоҳишингизга қараб кийим рангига мосланг ёки умуман бошқа рангли пойабзал кийиб ўзига хос кўрининг. Масалан, бинафша ранг кўйлак билан апелсин рангли ёки мовий ранг либос билан малина рангли туфли кийинг. Шунингдек, оқшом либосларини босоножкалар билан ҳам кийса бўлади, тилла ёки кумуш ранг босоножкалар эса образни шохона кўрсатади. Ўрта ва паст бўйли қизлар пошнаси баланд «шпилка» оёқ кийим кийиш керак деган қарашдан воз кечинг.
Baby doll услубидаги кўйлак
Baby doll — белга урғу берилган, этаги кенг, максимал даражада нафосатли кўрсатадиган услуб ҳисобланади. Бундай либослар билан балетка ва «Мери Жейн» моделидаги туфли кийиш маслаҳат берилмайди. Яхшиси кроссовка ва кета кийинг. Лекин образингиз маликаларникига ўхшаши кераклиги фикрингиздан қайтмаган бўлсангиз, унд қалин пошна ёки танкетли босоножка билан мосланг.
Совуқ кунларда кўйлак билан қандай оёқ кийим кийиш керак?
Водолазка ёки свитерли трикотаж кўйлак совуқ мавсум учун энг яхши вариант. Калта либослар билан ботфортлар ва узун этик чиройли туради ёки Prada, Stella McCartney моделлари сингари қалин ва қўпол услубдаги ботинка кийиб трендда бўлишингиз мумкин. Ботинкани қалин колготка билан кийиш керак бўлади.
Кўйлак билан пошнасиз пойабзал танлаш
Кўйлакларни пошнали оёқ кийим билан кийиш керак деган тушунчалар ўтмишда қолган. Футуристик услубдаги кроссовка, қалин ботинка ва ҳарбийларникига ўхшаш этик ва «казаки» билан образингиз бошқаларникига ўхшамас, ўзига хос кўринади.
Оёқ кийимни кўйлак рангига мослаш
Қаймоқ ранг, қора ва оқ либосга исталган пойабзал мос тушса, рангли либослар билан ҳаммаси бошқачароқ.
Кўк кўйлак билан
Кўк кўйлак билан кўк ранг туфли кия кўрманг. Образингиз зерикарли кўринади. Тилла ёки бошқа металл рангли пойабзалларга эътиборингизни қаратинг.
Қизил кўйлак билан
Қизил кўйлак билан ҳамма сингари оқ ёки қора пойабзал кийманг. Оч жигарранг ва оч қаҳва ранг туфлига эътиборингизни қаратинг.
Яшил кўйлак билан
Яшил рангли кўйлак билан сариқ, оловранг, бинафша ва тилларанг пойабзал кийинг. Атлас матоли либос билан замшли, ялтирамайдиган матоли кўйлак билан бошқа исталган матодан ишланган пойабзални кийинг. Ёрқин рангли либос билан буткул ёки ярми шаффоф бўлган учли туфли ўзига хос кўринишингизга сабабчи бўлади.
Изоҳ (0)