Давлат тест маркази интернетда тарқалаётган айрим жавоблар варақаларида бўялмаган ёки барча жавоблар бўялган бўлса-да, балл берилган ҳолатларга изоҳ берди.
«Ушбу ҳолатда ҳеч қандай қонун бузилиши аниқланмади. Бунда абитуриент томонидан расмда кўриниб турган саволларга нисбатан эътироз билдирилган ва унга мос доирача бўялмасдан қолдирилган. Эътирозни ўрганиш натижасида абитуриентнинг эътирози асосли топилиб, унга балл берилган.
Таъкидлаш керакки, шундан сўнг эътирозли деб топилган шу савол қайси тест топшириқлари китобларида тушган бўлса, барчасига балл берилган. Тегишли доирача бўялмаган ёки ўша саволнинг барча доирачалари бўялган бўлса ҳам», – дейилади ДТМ изоҳида.
Блогер Хушнудбек Худойбердиев бу ҳолатга ўз муносабатини билдирган.
«Соддароқ тилда тушунтирадиган бўлсам, ДТМнинг саволлар китобидаги ўша саволда нуқсон бўлган. Мисол учун, савол берилган-у, лекин техник хатолик сабаб жавоблар чоп этилмай қолган бўлиши мумкин. Ёки саволнинг ярми бор-у, ярми йўқ, ёхуд савол бошқа, унга берилган вариантлар умуман бошқа.
Хуллас, саволлар мана шунақа техник хатолик билан чоп этилган бўлса, қайсидир абитуриент шикоят қилган. Назоратчилар текшириб кўриб, ҳақиқатан савол-жавобда техник хатолик борлиги ҳақида далолатнома тузишган.
Кейинчалик ДТМ ҳам қайта текшириб, техник хатолиги бўлгани учун ўша саволга балл берган. Бу ижтимоий адолат жиҳатдан тўғри қарор, сабаби ДТМ хатоси учун абитуриент жавоб бермаслиги керак.
Ва энг қизиғи, худди ўша савол қайси абитуриентларга тушган бўлса, ўшаларнинг барчасига балл берилган. Ҳаммасини бўяган бўлса ҳам, очиқ қолдирган бўлса ҳам, қайсидир битта вариантни белгилаган бўлса ҳам, фарқи йўқ, ўша хато саволга ҳаммага балл берилган.
Ҳурматли абитуриентлар. Жавобни бўш қолдирса ёки ҳамма вариантни белгиласа, балл берилар экан, деган маслаҳатларга ишониб юрманг. Бунақа эмаслигини интернетда тарқаган расмлардан ҳам кўрса бўлади. 60 та бўш қолдирилган катакдан фақат биттасига, техник нуқсони бор саволгагина балл берилган. Шунинг учун бунақа қинғир усулларга эмас, ўз билимингизга ишонинг», – деб ёзади блогер Хушнудбек Худойбердиев.
Аввалроқ интернетда имтиҳон партаси остига нарса қўйиб кетган гуруҳ назоратчисининг видеоси тарқалган, ДТМ мазкур ҳолатга изоҳ бериб, гуруҳ назоратчиси парта тагига телефон ёки шу каби бирор қурилма эмас, балки тиббий ниқобини қўйганини билдирганди. Шунингдек, ДТМ 2—3 сентябрь кунги тест синовларида тест саволларининг расми интернетда тарқалгани бўйича текширув ўтказган.
Изоҳ (0)