Самарқандда ЙПХ инспекторининг қонуний талабларига бўйсунмай, ўзгалар ҳаётига хавф солган ҳолда транспорт воситасини бошқарган ҳайдовчи 6 суткага қамалди. Бу ҳақда вилоят ИИБ ахборот хизмати хабар берди.
Маълумотларга кўра, 3 сентябрь куни соат тахминан 23:45 ларда 19 ёшли Н.Т. Самарқанд шаҳар Мирзо Улуғбек кўчаси бўйлаб ўзига тегишли кул ранг Nexia-2 русумли автомашинани бошқариб келаётган вақтида Самарқанд вилояти ИИБ ЙҲХБ инспектори томонидан унга тўхташ ишораси берилган. Ҳайдовчи ЙПХ инспекторининг қонуний талабларига бўйсунмай, ҳаракатни давом эттириб кетаверган.
Шубҳали бўлган ушбу транспорт воситасига Самарқанд шаҳар Беруний ва Мирзо Улуғбек кўчалари чорраҳасида хизмат ўтаётган ЙПХ инспектори томонидан ҳам тўхташ ишораси берилишига қарамасдан, ҳайдовчи такроран ЙПХ инспекторларининг қонуний талабларини бажармасдан кескин ҳаракатланишда давом этган.
Таъкидланишича, ҳайдовчининг шахсига тезкорлик билан аниқлик киритилиб ушланган.
Унинг ҳаракатларида Маъмурий жавобгарлик тўғрисидаги кодекснинг 183, 194, 195-моддаларида (майда безорилик, ички ишлар органлари ходимининг қонуний талабларини бажармаслик, ички ишлар органлари ходимларининг ўз хизмат бурчларини бажаришларига қаршилик кўрсатиш) кўрсатилган ҳуқуқбузарлик аломатлари мавжудлигини инобатга олиниб, белгиланган тартибда маъмурий баённомалар расмийлаштирилган ва тўпланган ҳужжатлар кўриб чиқиш учун Самарқанд шаҳар Маъмурий ишлар бўйича судига юборилган.
Самарқанд шаҳар Маъмурий ишлар бўйича суди томонидан ҳуқуқбузарга нисбатан олти сутка маъмурий тартибда қамоқ жазоси тайинланган.
Аввалроқ Тошкентда 19 ёшли йигит Lacetti’да ЙПХ инспекторини уриб юборгани, инспектор шифохонанинг реанимация бўлимида вафот этгани ҳақида хабар берилган эди.
Изоҳ (0)