Хоразм вилояти Шовот тумани «Арбоблар» маҳалласида яшовчи фуқаро Ш.Р. YouTube тармоғи орқали видеомурожаат йўллаб, унда 2020 йил 26 август куни ички ишлар органлари томонидан ўтказилган тезкор тадбирда уларга нисбатан куч ишлатилганлигини билдирган. Бош прокуратура мазкур ҳолат юзасидан маълумот берди.
Аниқланишича, вилоят Ички ишлар бошқармаси, ДХХ Хоразм вилоят бошқармаси томонидан ўтказилган тезкор тадбирда Шовот тумани Чиғатойқалъа қишлоғи «Роят» маҳалласида яшовчи фуқаро Ж.Ҳ. 2020 йил 25 август куни соат 23:00 да ўз уйида қиморхона ташкил қилгани, фуқаро О.Д. ва бошқалар қимор ўйнаётганлиги устида ушланган.
Мазкур ҳолат юзасидан терговга қадар текшириш ҳаракатлари туман ИИБ томонидан олиб борилиб, 2020 йил 28 август куни Ж.Ҳ.га нисбатан Жиноят кодексининг 278-моддаси 1-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилган.
Бундан ташқари, фуқаро Ш.Р. ва бошқалар ўтказилган тезкор тадбир давомида ички ишлар ходимлари уларга нисбатан куч ишлатганлиги ва ҳақорат қилганлиги тўғрисида туман прокуратурасига ариза билан мурожаат қилган.
Мурожаат муаллифларининг барчасидан тушунтириш хатлари олиниб, фуқаро Д.О., Ш.Р., О.Й., У.Э., М.О., Ж.Ҳ., Ш.Б. ва А.Ё.да тан жароҳат излари бор ёки йўқлигини аниқлаш мақсадида суд тиббий экспертизадан ўтказилган.
Шунингдек, ички ишлар ходимларининг ҳаракатлари юзасидан вилоят ички ишлар бошқармасига хизмат текшируви тайинланган.
Ҳозирда терговга қадар текширув ҳаракатлари вилоят прокуратураси томонидан назорат олинган ҳолда туман прокуратураси томонидан олиб борилмоқда.
Изоҳ (0)