Сўнгги вақтларда хорижий давлатлардан Ўзбекистонга келаётган фуқароларнинг шахсга доир маълумотларидан учинчи шахслар томонидан ноқонуний равишда фойдаланилиб, уларнинг маълумотлари асосида мобил қурилмалар IMEI кодларини рўйхатдан ўтказиш ҳолатлари учрамоқда. Ўзбекистон Ички ишлар вазирлиги мазкур ҳолатга муносабат билдирди.
Вазирлик томонидан маълум қилинишича, мазкур ҳолатни муҳокама этиш мақсадида 3 сентябрь куни Ички ишлар вазирлиги, Давлат божхона қўмитаси ва «UZIMEI» тизими оператори масъул ходимлари иштирокида ишчи учрашув ўтказилиб, унда юзага келаётган муаммоларни бартараф этиш юзасидан тегишли чора-тадбирлар белгилаб олинди.
Ички ишлар вазирлиги томонидан таъкидланишича, шахсга доир маълумотлар Ўзбекистон Республикасининг 2019 йил 2 июлдаги «Шахсга доир маълумотлар тўғрисида»ги қонуни билан ҳимояланиб, фуқароларнинг шахсга доир маълумотларини қонунга хилоф равишда йиғиш, тизимлаштириш, сақлаш, ўзгартириш, тўлдириш, улардан фойдаланиш, уларни бериш, тарқатиш, узатиш, эгасизлантириш ва йўқ қилиш Ўзбекистон Республикасининг Маъмурий жавобгарлик тўғрисидаги Кодексининг 46-2-моддасига асосан фуқароларга базавий ҳисоблаш миқдорининг уч бараваридан беш бараваригача, мансабдор шахсларга эса беш бараваридан ўн бараваригача миқдорда жарима солишга сабаб бўлади. Ушбу ҳаракатлар маъмурий жазо қўлланилганидан кейин содир этилса, ёхуд бир гуруҳ шахслар томонидан олдиндан тил бириктирилиб, такроран ёки хавфли рецидивист томонидан, ғаразли ёки бошқа ғаразли ниятларда, хизмат мавқейидан фойдаланган ҳолда содир этилса, ёхуд оғир оқибатларга сабаб бўлса, Ўзбекистон Республикаси Жиноят Кодексининг 141-2-моддасига асосан уч йилгача озодликдан маҳрум қилиш билан жазоланади.
Вазирлик фуқароларга IMEI кодлар билан боғлиқ юқоридаги муаммолар юзага келган тақдирда яшаш манзиллари бўйича ички ишлар органларига мурожаат қилишни тавсия этган.
Аввалроқ Ахборот технологиялари ва коммуникацияларини ривожлантириш вазирлиги Ўзбекистонда бошқа шахсларнинг паспорт маълумотлари билан телефонларнинг IMEI кодини рўйхатдан ўтказаётганларга нисбатан тергов-суриштирув ишлари олиб борилаётганини маълум қилганди.
Давлат божхона қўмитаси эса IMEI кодларни рўйхатдан ўтказишда юзага келаётган муаммолар бўйича текширув ўтказмоқда.
Изоҳ (0)