Кувайтда аёллар илк бора судьялик лавозимига тайинланди

Кувайтда мамлакат тарихида илк бора саккиз нафар аёл судьялик лавозимига тайинланди. Бу ҳақда Le Figaro хабар берган.

Аёллар Олий судга тайинланган 54 нафар судья қаторидан ўрин эгаллаган.

Кувайтда аёлларнинг сайловларда иштирокчи сифатида овоз бериш ва сайланиш учун номзодини қўйишига 2005 йилда рухсат берилган.

Шунингдек, 15 йил аввал Массума Ал-Муборак биринчи вазир аёл сифатида лавозимга тайинланган. Орадан тўрт йил ўтгач, аёллар орасидан номзодлар Кувайт парламенти аъзолигига сайланди.

Кувайт Форс кўрфазидаги энг либераллашган мамлакатларда бири, лекин ушбу давлатда ҳали ҳам аёлларга берилган ҳуқуқлар борасида баҳсли ҳолатлар учраб туради.

2018 йил ноябрь ойида Кувайтда минглаб китоблар тақиқланган адабиётлар рўйхатига киритилган. Хусусан, Фёдор Достоевскийнинг «Ака-ука Карамазовлар» романи ҳам тақиққа учраганди.

Эслатиб ўтамиз, Кувайт ҳукумати июль ойида Ўзбекистондаги тиббиёт муассасаларини тиббий ускуналар билан жиҳозлаш учун 5,6 миллион АҚШ доллари миқдоридаги маблағ ажратганди.