Хакерлар Беларусь ички ишлар вазирлигининг сайтига ҳужум уюштирди. Улар президент Александр Лукашенко ҳамда ички ишлар вазири Юрий Караевни қидирувдаги жиноятчилар рўйхатига қўшиб қўйган. Бу ҳақда TJournal хабар қилди.
Хакерлар иккала амалдорни ҳам Беларусь халқига қарши ҳарбий жиноятларни амалга оширганликда айбламоқда.
Сайтга киберҳужум уюштирилгани ҳақида скриншотлар «Наша Нива» Telegram каналида эълон қилинган. Ҳозирда вазирликни сайти вақтинча ишламаяпти.
Беларусда бўлиб ўтган президентлик сайловларининг натижаларини бекор қилиш юзасидан халқ норозилик намойишлари деярли бир ойдан буён давом этмоқда. Беларусь МСК маълумотига кўра амалдаги президент Александр Лукашенко 80,1 фоиз овоз билан сайловларда ғолиб чиққан, мухолифат вакили Светлана Тихановская 10,1 фоиз овоз олган. Мухолифат расмий натижаларни тан олмаган ва Лукашенконинг истеъфога чиқиши ва сайловларнинг қайтадан ўтказилишини талаб қилмоқда.
Светлана Тихановская 11 август куни Беларусдан Литвага чиқиб кетган. Литва ҳукумати Светлана Тихановскаяга бошпана ва қўриқчилар тақдим этган. Тихановская 14 августда Беларусь мухолифатининг мувофиқлаштирувчи кенгаши тузилганини эълон қилган. У кенгашга ҳукумат ва норозилик намойиши ўтказаётган халқ ўртасидаги низонинг ҳал этилишини истаган барча бирлашмаларнинг вакиллари кириши мумкинлигини гапирган.
Лукашенко ушбу кенгашнинг тузилишини ҳукуматни ноқонуний йўл билан эгаллашга уриниш деб атаган. Беларусь конституцион суди кенгаш фаолиятини қонунга зид деб топган. Кенгашга нисбатан Беларусь Жиноят кодексининг 361-моддаси билан (миллий хавфсизликка таҳдид қиладиган ҳаракатларни амалга ошириш, ушбу ҳаракатларни қилишга чорлаш) бўйича иш қўзғатилган.
Латвия, Литва ва Эстония Александр Лукашенко ва яна 29 нафар беларуслик мансабдорга нисбатан санкция жорий қилган.
Изоҳ (0)