COVID-19 пандемияси аёлларнинг қашшоқлик даражаси ҳамда қашшоқликда яшовчи аёллар ва эркаклар ўртасидаги фарқни кескин оширади. Бу ҳақда БМТ-Аёллар ва БМТ Тараққиёт дастурининг (БМТТД) ҳисоботида маълум қилинган.
Қайд этилишича, 2019−2021 йилларда аёллар ўртасидаги қашшоқлик даражаси 2,7 фоизга пасайиши кутилаётган эди, аммо пандемия ва унинг оқибатлари сабабли бу кўрсаткич 9,1 фоизга ўсиши мумкин.
Мутахассисларнинг тахминларига кўра, 2021 йилга келиб ўта қашшоқликда (кунига икки доллардан кам маблағга) яшайдиган 25 ёшдан 34 ёшгача бўлган ҳар 100 эркак учун худди шундай шароитда яшаётган 118 аёл тўғри келади. 2030 йилга келиб бу фарқ 100 эркакка 121 аёлдан ошади.
«Биламизки, аёллар оила аъзоларига ғамхўрлик қилиш бўйича кўп вазифаларни ўз зиммаларига олади, улар кам ҳақ олишади, кам тежайдилар, одатда барқарор ишга эга эмаслар — умуман олганда, аёлларнинг иш билан бандлигининг барқарорлик даражаси эркакларникига нисбатан 19 фоизга камроқ», — деди БМТ-Аёллар ташкилоти раҳбари Фумзиле Мламбо-Нгкука.
Мавзуга доир: Twitter’да 40 ёшдан ошган аёллар ўз суратлари билан бўлишишни бошлади. Энди интернет-фойдаланувчилари қаришдан қўрқмаяпти
Ҳисобот маълумотлари шуни кўрсатадики, пандемия 2021 йилга келиб 96 миллион кишини ўта қашшоқликка олиб келади, улардан 47 миллион нафари аёллар ва қизлар ҳисобланади.
«Бу ўта қашшоқликда яшовчи аёллар ва қизларнинг умумий сонини 435 миллион кишига етказади ва бу кўрсаткич 2030 йилгача пандемиягача бўлган даражага қайтмайди», — дейилади БМТ Тараққиёт Дастури ҳисоботида.
БМТ Тараққиёт дастури раҳбари Ахим Штайнернинг айтишича, агар ҳукуматлар таълим ва оилани режалаштириш, адолатли ва тенг иш ҳақи ҳамда ижтимоий нафақаларни кўпайтириш бўйича кенг қамровли стратегияни амалга оширганида, 100 миллиондан ортиқ аёл ва қизларни қашшоқликдан қутқариш мумкин бўларди.
Унинг қўшимча қилишича, гендер тенгсизлигини камайтириш мақсадида сармоялар киритиши нафақат оқилона ва арзон, балки ҳукумат учун пандемия оқибатида юзага келадиган қашшоқликни камайтириш учун зудлик билан амалга оширилиши керак бўлган йўлдир.
Мавзуга доир:
Изоҳ (0)