Ўзбекистонда ҳафта охирига бориб ҳаво салқинлашиши кутилмоқда

Ўзгидромет ҳафта давомида кузатиладиган об-ҳаво маълумотини эълон қилди.

Унга кўра, 2—3 сентябрь кунлари Ўзбекистон ҳудуди кучсиз циклон ҳаракати таъсирида бўлади. Республикада ҳаво ўзгариб туради, ёғингарчилик кутилмайди, фақат эртага Андижон, Наманган, Фарғона вилоятлари ва мамлакатнинг тоғли ва тоғолди ҳудудларида айрим жойларга қисқа муддатли ёмғир ёғиши ва момақалдироқ бўлиши мумкин.

4 сентябрда республиканинг катта қисмида ҳаво очиқ бўлиши кутилмоқда, ёғингарчилик бўлмайди.

Шу кунларда ҳарорат кечаси 15-20 даража, кундузи 30-35 даража бўлади.

5—6 сентябрь кунлари Ўзбекистон ҳудудига Қозоғистон устидан ўтадиган антициклоннинг чегараси таъсир кўрсатади. Бундай синоптик вазият натижасида ҳаво салқинлашса-да, об-ҳаво, асосан, ёғингарчиликсиз бўлади. 5 сентябрда ҳарорат кечаси 15-20 даражагача, кундузи 27-32 даражагача пасаяди, 6 сентябрда яна бироз пасайиб, кечаси 12-17 даражани, кундузи 25-30 даражани ташкил қилади.

Республика бўйича шамолнинг тезлиги секундига 15-20 метргача кучайиш эҳтимоли бор.