Қозоғистоннинг Ғарбий Қозоғистон вилоятида бир ўриндиқли қўлбола самолётда парвоз қилган эркак 28 август тонгида ҳалокатга учради ва вафот этди. Бу ҳақда «Интерфакс» хабар берди.
Маълум қилинишича, самолётнинг 69 ёшли эгаси тез тиббий ёрдам етиб келгунига қадар вафот этган. Ҳодиса жойига тўртта техника ва 18 нафар қутқарувчи етиб борган.
Вафот этган эркак нафақадаги профессионал учувчи Павел Ерошенко бўлган. Учувчининг рафиқаси маълум қилишича, эркак бу самолётни 10 йил давомида йиғган ва уни «Орзу» деб номламоқчи бўлган. Учувчи биринчи парвозни 22 август куни амалга оширган, яқин атрофдаги дала устидан учиб ўтган, ҳаммаси яхши бўлган.
Самолётда видеорегистратор бўлган. Учувчининг рафиқаси Любов Ерошенконинг сўзларига кўра, парвоз вақтида турмуш ўртоғининг аҳволи ёмонлашган бўлиши мумкин.
Аёлнинг сўзларига кўра, Павел Ерошенко биринчи тоифали учувчи бўлган ва Шимолий флотда хизмат қилган. Унинг парвоз вақти уч минг соатдан кўпроқни ташкил этган. Учувчи Тинч, Атлантика ва Шимолий муз океанлари устида ҳарбий топшириқларни бажарган.
Изоҳ (0)