Ливан пойтахти Байрутдаги денгиз портида юз берган портлаш қурбонларининг сони 190 нафарга етди, ҳодиса оқибатида 6500 нафардан зиёд киши турли тан жароҳатлари олган. Бу ҳақда Ливан муваққат ҳукумати маълумотига таяниб Reuters агентлиги хабар қилди.

Фото: Getty Images

Байрутдаги портда 4 август куни кучли портлаш юз берган. Ҳодиса 2014 йилда Грузиядан Мозамбикка юк олиб кетаётган россиялик тадбиркор Игор Гречункинга тегишли кемадан мусодара қилинган 2750 тонна оғирликдаги аммиак селитраси ёниши оқибатида содир бўлган. Ливан бош вазири Байрутдаги мазкур портлашга узоқ йиллар давом этган коррупция ҳолатлари сабаб бўлганини айтган.

Портлаш оқибатида шаҳарнинг деярли ярми қисман ёки тўлиқ вайрон бўлган, 300 минг нафарга яқин одам уйсиз қолган. Байрут шаҳри маъмурияти фавқулодда юз берган ҳодиса зарари 15 миллиард АҚШ долларидан зиёд эканини билдирган ва воқеанинг халқаро доирада тафтиш қилинишини рад этган.