Самарқандда машинасини жарима майдончасидан чиқариб бериш эвазига ЙПХ ходимига 1,5 миллион сўм пора берган ҳайдовчи ушланди. Бу ҳақда ЙҲХББ матбуот хизмати хабар берди.
Маълум бўлишича, 27 август куни соат 11:20 ларда, Самарқанд вилояти ИИБ ЙҲХБ бўлинмалари ЙПХБ 1-отряд ЙПХ инспектори томонидан М-39 Тошкент-Термиз йўлининг 1081-километрида Malibu-2 русумли давлат рақам белгиси бўлмаган автомобиль тўхтатилиб текширилганда, ҳайдовчи 1991 йилда туғилган Х.Ж. меъёрий ҳужжатларсиз, давлат рақам белгисини ўзбошимчалик билан ечиб, ЙҲХБдан тегишли рухсатнома олмасдан автомобилнинг ён ва орқа ойналарини қорайтириб олган ҳолда бошқариб келаётганлиги аниқланган.
Ҳайдовчига белгиланган тартибда маъмурий баённома расмийлаштирилиб, транспорт воситаси вақтинча сақлаш учун жарима майдончасига жойлаштирилган.
27 август куни соат 12:15 ларда Самарқанд вилояти ИИБ ЙҲХБ ЙПХБ штаб видеокузатув гуруҳи кичик инспектори Ф.Эргашев маъмурий амалиёт хонасида хизмат вазифасини бажараётган вақтда олдига фуқаро Х.Ж. келиб автомашинасини жарима майдончасидан чиқариб бериш эвазига 1,5 миллион сўмни пора таклиф қилган.
Ходим фуқаро Х.Ж. билан ўрталарида бўлган суҳбатни телефон аппаратига ёзиб олганлигини, мазкур ҳолат бўйича тезкор тадбир ўтказилиб, фуқаро Х.Ж.га нисбатан қонуний чора кўришни билдирги орқали мурожаат қилиб сўраган.
Мазкур билдирги асосида 27 август куни соат 17:00 ларда ҳуқуқни муҳофаза қилувчи орган ходимлари ҳамкорлигида ўтказилган тезкор тадбир давомида, фуқаро Х.Ж. кичик инспектор Ф.Эргашевнинг хизмат хонасида 1,5 миллион сўм пулларни пора сифатида берган вақтида ашёвий далиллар билан ушланган.
Мазкур ҳолат юзасидан Самарқанд шаҳар прокуратураси томонидан терговга қадар текширув ҳаракатлари ўтказилмоқда.
Аввалроқ ЙҲХББ ЙПХ ходими хизмат автомашинасида турли манёврларни бажараётгани тасвирланган видеога муносабат билдиргани, Қўқонда аёл ЙПХ инспекторига қўл кўтарган қоидабузар ҳайдовчига нисбатан жиноят иши қўзғатилгани хабар берилган эди.
Изоҳ (0)