Самарқанд вилоятида 2020 йилнинг ўтган даври мобайнида 24 та туристик лойиҳа ишга туширилган. Хусусан, вилоятда 6 та меҳмонхона фойдаланишга топширилган бўлса, 21 та оилавий меҳмон уйлари ташкил этилган. Шунингдек, сайёҳларга хизмат кўрсатувчи 8 та туристик микроавтобуслар сотиб олиниб, 12 та туроператорлик фаолияти йўлга қўйилган. Бу ҳақда «Дарё» мухбири хабар берди.
Пандемия шароитига қарамасдан Самарқанд шаҳри ва вилоятнинг табиати мафтункор тоғли ҳудудларида, дам олиш масканлари сони 40 тага етказилиб, бир кунда 5700 нафар меҳмонни қабул қилиш имконияти яратилган.
Хусусан, Самарқанд тумани «Янги жой» маҳалла фуқаролар йиғинида Oqbo‘yra garden дам олиш масканида умумий қиймати 10 миллиард сўм бўлган 20 та ёзги ва 20 та қишки дам олиш уйи, бассейн, умумий овқатланиш маркази фойдаланишга топширилган.
Эслатиб ўтамиз, аввалроқ пандемия даврида жойлаштириш воситаларининг юкламаси кескин тушиб кетиши ва аксарият ҳолларда улар фаолиятининг тўхтатилганлиги сабабли 2020 йил 28 майдаги «Коронавирус пандемиясининг салбий таъсирини камайтириш учун туризм соҳасини қўллаб-қувватлашга доир кечиктириб бўлмайдиган чора-тадбирлар тўғрисида»ги Президент фармонига мувофиқ, туристик (меҳмонхона) йиғимни ҳисоблаш ва тўлаш 2021 йилнинг 1 январигача тўхтатилгани ҳақида хабар берилганди.
Изоҳ (0)