Тошкент шаҳар ҳокимлиги Яшнобод туманидаги Паҳлавон Маҳмуд кўчаси 25, 27, 8, 8А уйларда яшовчи аҳолининг 2020 йил 19 август кунидаги видеомурожаати юзасидан изоҳ берди.
Қайд этилишича, мурожаат чиқишидан аввал мазкур турар жой уйлари «Ўздонмаҳсулот» АЖга тегишли қозонхонадаги иссиқлик энергияси билан таъминланган. «Ўздонмаҳсулот» АЖ технологик жараёнлари таъмирланганлиги боис ушбу уйларда иссиқлик таъминоти тўхтатилган.
Таъкидланишича, вужудга келган вазиятни ҳал қилиш учун Тошкент шаҳар ҳокимлиги ва «Тошиссиққуввати» ДУК томонидан янги иссиқлик трассасини қуриш ва ушбу уйларни «Авиашаҳарча-22» локал қозонхонасига улаш бўйича ишлар бошланган.
Юқорида кўрсатилган уйларнинг қозонхонага уланиши «Авиашаҳарча-22» қозонхонасига уланган турар жойларнинг иссиқлик таъминотига салбий таъсир кўрсатмаслиги учун локал қозонхона ускуналарининг қувватини ошириш ишлари олиб борилаётгани ва узунлиги 384 п/м бўлган янги иссиқлик трассаси қурилаётгани маълум қилинган.
Шунга кўра, локал қозонхона ускуналарини реконструкция қилиш учун 95 миллион сўм ва янги иссиқлик трассаси қурилиши учун 1 миллиард 15 миллион сўм маблағ ажратилган.
Ҳокимлик томонидан ишлар 24 август куни бошланиб, 10 кун ичида якунланиши таъкидланган.
Мавзуга доир:
Изоҳ (0)