Миттенс лақабли малларанг мушук Янги Зеландияда йилнинг энг машҳури дея эътироф этилиши мумкин, деб ёзади Harper’s Bazaar. Шу вақтгача эътирофга ҳайвонлар номзоди қўйилмаган.
Таъкидланишига қараганда, маҳаллий аҳоли билан танишиб улгурган Миттенс ҳар куни Веллингтон шаҳри бўйлаб сайр қилади. Эгаси шаҳар марказини кезиши учун бемалол кўчага қўядиган мушукни тату-салон, офис, университет ва почта идоралари, шунингдек, черковларда кўриш мумкин. Лекин маҳаллий аҳоли уни дайдиб, йўқолиб қолган деб ўйлаб бир неча маротаба полиция идорасига ҳам олиб борган.
Мушук бир неча марта ҳайвонлар билан шафқатсиз муносабатда бўлишнинг олдини олиш жамиятига олиб борилганидан кейин Миттенсда ҳаммаси жойида экани, қутқаришнинг ҳожати йўқлигини бошқаларга билдириш мақсадида унинг номидан Facebook’да саҳифа очишга қарор қилинган, ҳозирда унинг 50 минг кузатувчиси бор. Аввалроқ эса мушукка шаҳар рамзий калити берилган.
Мушукдан ташқари мазкур эътирофга Янги Зеландия бош вазири Жасинда Ардерн ва Соғлиқни сақлаш департаменти раҳбари Эшли Блумфилднинг номзодлари қўйилган. Аввалги ғолиблар орасида актёр ва режиссёр Тайка Вайтити, комик Майк Кинг ва регби спорти бўйича All Blacks жамоасининг собиқ аъзоси Ричи Маккоу бор.
Изоҳ (0)