Лионель Месси трансфери юзасидан фақат иккита клуб унинг отасига мурожаат қилгани маълум бўлди

«Барселона» сардори Лионель Мессининг жамоадаги келажаги мавҳум бўлиб қолмоқда.

Mundo Deportivo журналисти Франсеск Агиларнинг ёзишича, ҳозирда аргентиналик футболчига фақат икки клубдан қизиқиш бор — ПСЖ ва «Интер». Уларнинг вакиллари вазиятни ўрганиш учун футболчининг отаси билан боғланган.

Парижликлар клуби аллақачон Мессини харид қилиш борасида режа ишлаб чиққан ва буни молиявий фейр-плей қоидаларидан четга чиқмаган ҳолда уддалашни билади. Париж шаҳри футболчининг турмуш ўртоғи Антонеллага ёқади, у ерда уларнинг кўплаб дўстлари истиқомат қилади.

Аввалроқ футболчига даъвогарлар қаторида эътироф этилган «Манчестер Сити» Мессини таклиф қилиш борасида бирорта ҳаракатни амалга оширмаган.

Таъкидланишича, Месси бир неча ойдан буён «Барселона»ни тарк этишни ўйламоқда. Унга клубнинг иш юритиш тизими ва жамоа атрофидаги атмосфера ёқмаяпти.

Аввалроқ Месси «Барселона»нинг яниг бош мураббийи Рональд Куман билан учрашгани ва унга жамоани тарк этиш ниятида эканини айтгани хабар қилинганди.