Футбол бўйича Европа Лигаси финалида «Севилья» ва «Интер» жамоалари 21 август, жума куни ўзаро баҳс юритди.
Учрашув дебютида миланликлар пенальти ишлаб олди, 11 метрлик жарима зарбасини Ромелу Лукаку голга айлантирди. Орадан кўп ўтмай испанлар Люк де Йонгнинг голи билан жавоб қайтарди.
33-дақиқада нидерландиялик футболчи иккинчи голини урган ҳолда энди «Севилья»ни олдинга олиб чиқди. Бироқ икки дақиқа ўтиб Диего Годин мувозанатни тиклади.
Иккинчи бўлим ҳам тенг курашлар остида ўтди, бироқ имкониятларни голга айлантиришда севиляликлар омадлироқ ҳаракат қилди. 74-дақиқада Диего Карлоснинг чалқанча усулда берган зарбасидан кейин тўп Лукакуга тегиб дарвозадан ўрин олди. Қолган вақтда ҳисоб ўзгармади.
Шу тариқа «Севилья» олтинчи марта Европа Лигаси бош совринига эга чиқди.
Европа Лигаси
Финал баҳси
21 август, жума
«Севилья» Испания — «Интер» Италия 3:2
Голлар: 0:1 – 5, пенальти Лукаку, 1:1 – 12 де Йонг, 2:1 – 33 де Йонг, 2:2 – 35 Годин, 3:2 – 74 Диего Карлос.«Севилья»: Буну, Диего Карлос (Гудел, 86), Кунде, Навас, Регилон, Фернандо, Жордан, Окампос (Мунир, 71), Банега, Сусо (Васкес, 78), де Йонг (Эн-Несири, 85).
«Интер»: Ҳанданович, Янг, де Врей, Бастони, Д`Амброзио (Мозес, 78), Брозович, Гальярдини (Эриксен, 78), Барелла, Годин (Кандрева, 90), Мартинес (Санчес, 78), Лукаку.
Огоҳлантиришлар: Диего Карлос (4), Барелла (41), Банега (45), Бастони (55), Гальярдини (73).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)