Бухоро вилояти ҳокими вазифасини бажарувчи Карим Камолов 22 август куни 65 ёшида вафот этди.
Бухоро вилояти ҳокими вазифасини бажарувчи Карим Камолов коронавирусга чалиниб, Тошкентда касалликдан даволанаётгани ҳақида илк бор 30 июль куни Соғлиқни сақлаш вазирлиги ҳузуридаги Коронавирусга қарши кураш штаби аъзолари маълум қилган эди. Бухоро вилояти ҳокимлиги 31 июль куни ушбу ахборотни тасдиқлаб, ҳокимда касаллик 25 июль куни тасдиқлангани, у дастлаб Республика шошилинч тиббий ёрдам илмий маркази Бухоро вилояти филиалида даволангани, 29 июль Тошкентга кўчирилганини маълум қилганди.
Карим Камоловнинг вафот этгани ҳақида август ойининг ўзида икки марта хабар тарқалганди. 4 августдан бошлаб вилоят аҳолиси ўртасида «Бухоро ҳокими Тошкентдаги шифохонада вафот этибди. Айни пайтда собиқ вилоят раҳбари Ўктам Барноевнинг ҳам аҳволи ўта оғир экан. Агар унинг ҳам ҳаётини сақлаб қолиш имкони бўлмаса, икки мутасадди жасади битта самолёт орқали Бухорога келтирилар экан» деган шов-шувли хабарлар тарқалган. Вилоят ҳокими ўринбосари Фарҳод Умаров 7 августдаги брифингда бу гап-сўзларни рад этиб, ҳоким яқин кунларда фаолиятини давом эттиришини айтганди.
17 август куни эса бош вазир Абдулла Ариповнинг Бухорога ташрифи ортидан Карим Камолов вафоти этгани, бош вазир янги раҳбарни тайинлаш бўйича бўйича вилоятга ташриф буюргани ҳақида гап-сўзлар урчиганди. Бир нечта нашр унинг вафот этгани ҳақида хабарлар ҳам чоп этди. Bukhara News канали вилоят Соғлиқни сақлаш бошқармаси бошлиғи Илҳом Нарзиевга асосланиб, «Карим Камоловнинг аҳволи жуда оғир, кома ҳолатида» экани ҳақида хабар берди. Шунингдек, канал ҳокимнинг уйи атрофи тезкорлик билан асфальт қилинаётгани, Ҳазрат Имом қабристонида ободонлаштириш ишлари олиб борилаётганини ёзганди. Ўшанда ҳокимлик матбуот хизмати Карим Камоловнинг аҳволи оғирлигини тасдиқлаган ҳолда асфальтлаш ишлари таъзияга тайёргарлик билан боғлиқ эмаслигини билдирганди.
2020 йилнинг февралида Бухоро вилояти ҳокими Ўктам Барноев бош вазир ўринбосари этиб тайинлангани муносабати билан Карим Камолов вилоят ҳокими вазифасини бажарувчи этиб тайинланган эди. Унгача Камолов Бухоро шаҳари ҳокими вазифасида ишлаган.
Карим Камолов «Дарё» ҳисоби бўйича коронавирус асоратларидан вафот этган Ўзбекистондаги 272-бемор ҳисобланади.
Эслатиб ўтамиз, 31 июль куни Қорақалпоғистон Жўқорғи Кенгеси раиси, Ўзбекистон Қаҳрамони, сенатор Муса Ерниязов коронавирус инфекцияси асоратларидан вафот этган эди. Коронавирусга чалинган Сурхондарё вилояти ҳокими Тўра Боболов ва Навоий вилояти ҳокими Қобул Турсунов ҳозирда касалликдан соғайиб, ўз иш фаолиятини тиклади.
Изоҳ (0)