Buxoro viloyati hokimi vazifasini bajaruvchi Karim Kamolov 22-avgust kuni 65 yoshida vafot etdi.
Buxoro viloyati hokimi vazifasini bajaruvchi Karim Kamolov koronavirusga chalinib, Toshkentda kasallikdan davolanayotgani haqida ilk bor 30-iyul kuni Sog‘liqni saqlash vazirligi huzuridagi Koronavirusga qarshi kurash shtabi a’zolari ma’lum qilgan edi. Buxoro viloyati hokimligi 31-iyul kuni ushbu axborotni tasdiqlab, hokimda kasallik 25-iyul kuni tasdiqlangani, u dastlab Respublika shoshilinch tibbiy yordam ilmiy markazi Buxoro viloyati filialida davolangani, 29-iyul Toshkentga ko‘chirilganini ma’lum qilgandi.
Karim Kamolovning vafot etgani haqida avgust oyining o‘zida ikki marta xabar tarqalgandi. 4-avgustdan boshlab viloyat aholisi o‘rtasida “Buxoro hokimi Toshkentdagi shifoxonada vafot etibdi. Ayni paytda sobiq viloyat rahbari O‘ktam Barnoyevning ham ahvoli o‘ta og‘ir ekan. Agar uning ham hayotini saqlab qolish imkoni bo‘lmasa, ikki mutasaddi jasadi bitta samolyot orqali Buxoroga keltirilar ekan” degan shov-shuvli xabarlar tarqalgan. Viloyat hokimi o‘rinbosari Farhod Umarov 7-avgustdagi brifingda bu gap-so‘zlarni rad etib, hokim yaqin kunlarda faoliyatini davom ettirishini aytgandi.
17-avgust kuni esa bosh vazir Abdulla Aripovning Buxoroga tashrifi ortidan Karim Kamolov vafoti etgani, bosh vazir yangi rahbarni tayinlash bo‘yicha bo‘yicha viloyatga tashrif buyurgani haqida gap-so‘zlar urchigandi. Bir nechta nashr uning vafot etgani haqida xabarlar ham chop etdi. Bukhara News kanali viloyat Sog‘liqni saqlash boshqarmasi boshlig‘i Ilhom Narziyevga asoslanib, “Karim Kamolovning ahvoli juda og‘ir, koma holatida” ekani haqida xabar berdi. Shuningdek, kanal hokimning uyi atrofi tezkorlik bilan asfalt qilinayotgani, Hazrat Imom qabristonida obodonlashtirish ishlari olib borilayotganini yozgandi. O‘shanda hokimlik matbuot xizmati Karim Kamolovning ahvoli og‘irligini tasdiqlagan holda asfaltlash ishlari ta’ziyaga tayyorgarlik bilan bog‘liq emasligini bildirgandi.
2020-yilning fevralida Buxoro viloyati hokimi O‘ktam Barnoyev bosh vazir o‘rinbosari etib tayinlangani munosabati bilan Karim Kamolov viloyat hokimi vazifasini bajaruvchi etib tayinlangan edi. Ungacha Kamolov Buxoro shahari hokimi vazifasida ishlagan.
Karim Kamolov “Daryo” hisobi bo‘yicha koronavirus asoratlaridan vafot etgan O‘zbekistondagi 272-bemor hisoblanadi.
Eslatib o‘tamiz, 31-iyul kuni Qoraqalpog‘iston Jo‘qorg‘i Kengesi raisi, O‘zbekiston Qahramoni, senator Musa Yerniyazov koronavirus infeksiyasi asoratlaridan vafot etgan edi. Koronavirusga chalingan Surxondaryo viloyati hokimi To‘ra Bobolov va Navoiy viloyati hokimi Qobul Tursunov hozirda kasallikdan sog‘ayib, o‘z ish faoliyatini tikladi.
Izoh (0)