Самарқанд шаҳрида профилактика инспектори ва унинг жамоат тартибини сақлаш бўйича ёрдамчилари Обираҳмат каналидан оқиб ўтувчи сувда чўкаётган маст фуқарони қутқариб қолди. Бу ҳақда «Дарё»га Самарқанд вилояти ИИБ ахборот хизмати маълум қилди.
Маълум бўлишича, 2020 йилнинг 14 август куни соат тахминан 14:15 атрофида Самарқанд шаҳридан оқиб ўтувчи Обираҳмат канали ён атрофида ўз хизмат фаолиятини олиб бораётган Самарқанд шаҳри бўйича ИИО ФМБ 7-сон ИИБ профилактика инспектори Ф.Раҳматов номаълум фуқаронинг сувда чўкаётганини кўриб қолган. Зудлик билан қутқарув чоралари кўрилиб, профилактика инспекторининг жамоат тартибини сақлаш бўйича ёрдамчилари К.Маҳмудов ҳамда А.Норқулов фуқарони сувдан олиб чиққан.
Ҳодиса жойига тез тиббий ёрдам хизмати чақирилган. Тиббий ёрдам хизмати етиб келгунга қадар профилактика инспектори томонидан фуқарога биринчи тиббий ёрдам кўрсатилиб, ҳушига келтирилган. Ўз вақтида етиб келган тез тиббий ёрдам хизмати шифокорлари фуқарога керакли муолажаларни кўрсатган.
Текширув давомида фуқаро кучли даражада маст ҳолатда бўлганлиги маълум бўлди.
Олиб борилган тезкор-суриштирув ишлари натижасида ушбу шахс Самарқанд шаҳар «Гала Осиё» МФЙда яшовчи 1979 йилда туғилган Х.И. эканлиги аниқланиб, яшаш хонадонига соғ-саломат олиб борилган.
Изоҳ (0)