Тошкент вилоятининг Оққўрғон туманида «Гепарин-белмед» 500 мл дори воситасини асоссиз равишда оширилган нархда сотган шахслар қўлга олинди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, фуқаролар Х.С. ва Х.М. олдиндан тил бириктириб, пандемия шароитида ноқонуний даромад орттириш мақсадида аҳолининг талаби юқори бўлган дориларнинг нархларини сунъий равишда ошириб сотиш билан шуғулланган.
Улар фуқаро М.га 30 қути «Гепарин-белмед» 500 мл дори воситасини ҳар бир қутисини 270 минг сўмдан ҳисоблаб, жами 8,1 миллион сўмга сотган вақтида Департаментнинг Оққўрғон тумани бўлими томонидан ўтказилган тезкор тадбирда ашёвий далил билан ушланган.
Ҳолат юзасидан Х.С. ва Х.М.га нисбатан Жиноят кодексининг 186-3-моддаси 2-қисми «б» банди билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистонда дорилар танқислиги ва нархи оширилгани юзасидан 3000 дан ортиқ дорихоналарга огоҳлантириш берилгани, Бош прокуратура ҳузуридаги Иқтисодий жиноятларга қарши кураш департаментининг Тошкент шаҳар бошқармаси томонидан ўтказилган рейдларда ҳозирда талаб кескин ортган ва дорихоналарда топиш қийин бўлган «Эргоферон» ва «Арбидол» дориларининг ноқонуний савдоси аниқлангани ҳақида хабар берилганди.
Изоҳ (0)