Ўзбекистонда январь—июль ойларида 48,8 трлн сўмлик қурилиш ишлари амалга оширилди

Ўзбекистонда 2020 йилнинг январь—июль ойларида жами 48,8 триллион сўмлик қурилиш ишлари бажарилиб, ўсиш суръати 2019 йилнинг шу даврига нисбатан 5,7 фоизни ташкил этди, деб хабар бермоқда Давлат статистика қўмитаси.

Қайд этилишича, қурилиш ишлари ҳажми йирик қурилиш ташкилотлари, кичик корхона ва микрофирмалар ҳамда норасмий секторларда амалга оширилган ишлар таркиби бўйича шаклланади.

Амалга оширилган қурилиш ишлари мулкчилик шакли, давлат ва нодавлат бўлган корхона ва ташкилотлар таркиби бўйича бўлинади.

Таъкидланишича, қурилиш соҳасида корхона ва ташкилотлар сони 2020 йилнинг 1 август ҳолатига кўра, 39,1 мингтани ташкил этиб, ўтган йилнинг мос даврига нисбатан 6,1 мингтага ошган.

Жами қурилиш соҳасидаги корхона ва ташкилотлар сони кўпайишининг асосий омили бу бино ва иншоотлар қуриш ишларининг ўтган йилга нисбатан 11,0 фоизга (жами қурилишдаги улуши 58,0 фоиз), фуқаролик объектларини қуриш 29,8 фоизга (жами қурилишдаги улуши 9,6 фоиз), ихтисослаштирилган қурилиш ишларининг 30,5 фоизга (жами қурилишдаги улуши 32,4 фоиз) ўсиши сифатида кўрилмоқда.

Жами қурилиш ишлари ҳажми таркибида йирик қурилиш ташкилотлари томонидан бажарилган қурилиш ишлари ҳажми 2020 йилнинг январь—июль ойларида 13,3 триллион сўмни ташкил этди. Қурилиш ишлари 2019 йилнинг январь—июль ойларига нисбатан 24,5 фоизга кўп бажарилган бўлиб, жами қурилиш ишлари ҳажмидаги улуши 2019 йилнинг мос давридаги кўрсаткич даражасидан 4,1 фоиз пунктга кўпайиб, 27,3 фоизни ташкил этган.

Кичик корхона ва микрофирмалар томонидан бажарилган қурилиш ишлари ҳажми 2020 йилнинг январь—июль ойларида қурилиш ишларини бажарган бошқа ташкилотларга нисбатан ошганлиги кузатилган. Улар ҳиссасига жами қурилиш ишлари ҳажмининг 55,7 фоизи тўғри келиб, 2019 йилнинг январь—июль ойлари кўрсаткичига нисбатан 0,9 пунктга камайган.

Шунингдек, улар ҳиссасига тўғри келган қурилиш ишлари ҳажми 2019 йилнинг мос даврига нисбатан 104,2 фоизни ташкил этган ҳолда 27,1 триллион сўм миқдорида қайд этилган.