Беларусь президенти Александр Лукашенко мухолифатнинг мувофиқлаштириш кенгашини тузишини ҳукуматни эгаллашга бўлган уриниш деб баҳоламоқда. «Tut.by» унинг сўзларидан иқтибос келтирган.
«Кам ёки кўп даражада уларга бошқарувни топшириш талаб қилинади. Буни мен ҳукуматни эгаллаш мақсадида қилинган ҳаракат деб баҳолайман», — деган Лукашенко.
Беларусь давлат раҳбарининг сўзларига кўра, кенгаш таркибига ҳукуматни тарк этган собиқ амалдорлар ҳам кирган, деб хабар берган Беларусдаги Европа радиоси.
«Кенгашда ўта миллатчи, ‘хўрланган’ собиқ амалдорлар йиғилган», — дея Лукашенконинг сўзларини келтирган радиостанциянинг Telegram канали.
Мавзуга доир: Туркманистон президенти нима сабабдан Лукашенкони президентлик сайловларидаги ғалаба билан табрикламади?
Кенгаш таркибига фуқаролик жамиятининг вакиллари, ўз ишининг усталари, обрў-эътиборга эга, машҳур беларуслар киритилади.
Кенгаш таркиби 17 августда қисман шакллантирилган. Унга адабиёт йўналишида Нобел мукофотини қўлга киритган Светлана Алексиевич, «Весна» ҳуқуқ ҳимоячилари маркази раҳбари Алесь Беляцкий, Светлана Тихановская ҳамда Виктор Бабриконинг сайловчилар штабларига аъзо бўлган фаоллар кирган.
Аввал Канада ва Ирландиянинг Беларусдаги президентлик сайловларида Александр Лукашенко ғалаба қозонганини тан олишдан бош тортгани ҳақида хабар берилганди.
Мавзуга доир: Чекинмас беларуслар. 17 августнинг асосий воқеалари
Изоҳ (0)