Туркманистоннинг расмий ОАВлари Беларусда содир бўлаётган воқеалар ҳақида ҳеч қандай маълумотларни тақдим этмаяпти. Шу билан бирга, Туркманистон президенти Гурбангули Бердимуҳамедов президентлик сайловларида ғалабага эришган Александр Лукашенкони табрикламаган МДҲ давлатлари орасидаги ягона президент бўлиб қолмоқда, деб ёзади Tengrinews.
Россиялик журналист Аркадий Дубновнинг фикрича, Бердимуҳамедов Лукашенкони Туркманистон ва Беларусь ўртасидаги кенг кўламли молиявий баҳслар сабаб табриклашга шошмаган.
Президентлар ўртасидаги муносабатнинг бузилишига Беларусь компанияси томонидан Гарликда қурилган ўғитларни ишлаб чиқаришга ихтисослашган завод кутилган натижани бермагани сабаб бўлган.
Қиймати 1,1 миллиард доллар турадиган «Гарлик» заводи 2017 йилнинг мартида ишга туширилган бўлиб, уни қуриш ишлари 2009 йилнинг ёзида бошланган эди. Ўшанда туркман ОАВлари мамлакат ҳар йили Хитой ва Ҳиндистонга 1,2 миллион тонна ўғит экспорт қилишни режалаштираётгани тўғрисида хабарлар тарқатган.
Туркманистон томонидан тақдим этилган расмий маълумотларга кўра, 2018 йилнинг январидан сентябрига қадар «Гарлик» заводида жами 24,2 минг тонна калий ўғитли ишлаб чиқарилган. Ушбу кўрсаткич заводнинг йиллик ишлаб чиқариш қувватини 2 фоизини ташкил этади.
«Бироқ кейинчалик туркман оммавий ахборот воситалари ижтимоий тармоқлар ва Беларусь ОАВларида тарқалган турли хил хабарларга қарамай, заводдаги вазият ва ишлаб чиқариш режаларини амалга ошириш тўғрисида қўшимча маълумот бериш зарур деб топмади», — дейилади хабарда.
Аввалроқ Европа парламенти Лукашенкога Persona non grata мақомини берди ва Москвадан Беларусь ишларига аралашмасликни сўрагани тўғрисида хабар берилганди.
Мавзуга доир:
Изоҳ (0)