Германиянинг автоуйлар ишлаб чиқаришга ихтисослашган Unicat компанияси яшаш зонаси ва устахонага мўлжалланган икки ўқли WТ69 модулини тақдим этди. Симметрик тиргак узоқ саёҳатларга чиқиш билан бирга, автопойгаларда кўчма таъмирлаш зонаси сифатида ҳам фойда беради, деб ёзади Motor.
Икки ўқли устахона-тиркаманинг узунлиги 7 метрни, эни эса — 2,5 метрни ташкил этади. Ҳаракатланувчи модул кузови шиша пластикдан ишланган. Тиркамага ҳар бирининг сиғими 400 литрга тенг иккита ёқилғи баки қотирилган бўлиб, улардан бири яшаш зонасини иситишга мўлжалланган. Кемперга йўлтанламас резиналарга эга 20 дюймли ғилдираклар «кийдирилган». Бундан ташқари, ғилдираклар устидаги уйнинг том қисмига ёруғлик диодли мачта ва қуёш батареялари ўрнатилган.
Ҳаракатланувчи тиркаманинг яшаш модулидан бешта кароват ўрин олган бўлиб, улардан бири трансформацияланади, шунингдек, 32 дюймли телевизор ва симсиз интернет ҳам бор. Бундан ташқари, ошхонага газ плитаси, музлаткич ва идиш-товоқлар жамланмаси жойлаштирилган. Автоуй ичидан душ кабинаси, ҳожатхона ва сиғими 60 ҳамда 200 литрга тенг иссиқ сув идишлари мавжуд.
Шу билан бирга, тиркама махсус устахона билан жиҳозланган бўлиб, муҳандислар у ерга таъмирлаш ва техник хизмат кўрсатишда зарур бўладиган барча нарсаларни жойлаштирган. Масалан, иш зонасида захира генератори, электр ва пневматик ускуналар, шунингдек, пайвандлаш аппаратлари ва ишлатиладиган материлларни сақлашга мўлжалланган бўлмали иш столи ҳам мавжуд.
Аввалроқ «АвтоВАЗ» маҳсулотларини қайта ишлаш билан шуғулланувчи Москвадаги Lux Form компанияси Lada 4х4 («ВИС-2346») базасида яратилган автоуйни тақдим этган эди.
Изоҳ (0)