АҚШ президенти Дональд Трамп TikTok видеосервисига эгалик қилувчи ByteDance’нинг ортидан Хитойнинг Қўшма Штатларда фаолият юритаётган бошқа компанияларига ҳам босим ўтказилиши мумкинлигини инкор этмади. Бу ҳақда у Оқ уйда ўтказилган матбуот анжуманида маълум қилган.
У журналистларнинг ҳукумат Alibaba корпорациясига қарши чекловлар жорий этишни режалаштираётгани тўғрисидаги саволларга ишончли жавоб қайтарган. «Ҳа, биз бошқа вариантларни ҳам кўриб чиқмоқдамиз», — деган Трамп.
Президент Хитойнинг Huawei компаниясига нисбатан жорий этилган чекловлар ҳақида эслатиб ўтган ва уларни бекор қилиш ниятида эмаслигини билдирган. «Huawei бу ерга келмайди», — дея қўшимча қилган АҚШ президенти.
Alibaba — электрон тижорат ва рақамли тўловлар борасида дунёдаги энг йирик компаниялардан бири ҳисобланади. Унинг гуруҳидан бир неча шўъба компаниялари ва интернет майдончалари — Alibaba Pictures, Alibaba.com, AliExpress.com, Taobao.com, Tmall.com ўрин олган. Компанияга Жек Ма томонидан 1999 йилда асос солинган бўлиб, Forbes ҳисоб-китоби бўйича унинг бойлиги 48,4 миллиард долларга баҳоланган.
Аввалроқ Трамп ByteDance компаниясига уч ой ичида АҚШдаги барча активларини сотиб юбориш ва фойдаланувчиларнинг йиғилган барча шахсий маълумотларини ўчириб ташлаш мажбуриятини юкловчи қарорни имзолаган. Шунингдек, ҳужжат билан ByteDance’га Мusical.ly мусиқий сервисини харид қилиш, бундан ташқари, компаниянинг шўъба корхоналари орқали ушбу сервиснинг ҳар қандай активларига эга чиқиш тақиқланган.АҚШ ҳукумати TikTok сервиси америкаликларнинг шахсий маълумотларини Хитой ҳукуматига топшириши мумкин, деб ҳисоблайди. Июль ойининг бошида АҚШ давлат котиби Майкл Помпео видеоилова АҚШда блокланиши мумкинлигини маълум қилган. Кейинроқ Трамп TikTok 15 сентябрга қадар Microsoft ёки Американинг бошқа компаниясига сотилишини талаб қилган эди.
Изоҳ (0)