Россияда коронавирусга қарши яратилган «Спутник V» вакцинаси синовининг учинчи босқичи узоғи билан ўн кун ичида бошланади. Бу ҳақда Гамалея номидаги Эпидемиология ва микробиология маркази директори Александр Гинцбургга таяниб, «Коммерсантъ» хабар берди.
Маълумотларга кўра, тадқиқотлар Москва ҳудудида ўн минглаб инсонлар иштирокида ўтказилади. Вакцинанинг оддий фуқароларга тарқатилиши рўйхатга олишдан кейинги босқичдан бир ой ўтгач бошланади.
«Жамоатчилик ва матбуотнинг бунга бўлган катта қизиқиши ва эътиборидан келиб чиқиб, Соғлиқни сақлаш вазирлиги узоқ чўзмасдан, бир ҳафта ичида бизга протоколни тасдиқлаб беради деб ўйлайман. Фикримча, етти, узоғи билан ўн кун ичида барчаси бошланади… Унда бир неча ўн минг киши иштирок этади», — дейди Гинцбург.
Унинг сўзларига кўра, ҳозирда молиявий масалалар ҳал этилмоқда, чунки бу «арзон турмайди». Гамалея номидаги марказ директорининг маълум қилишича, Москвада тадқиқотни ўтказиш учун барча зарурий инфратузилма мавжуд.
Эслатиб ўтамиз, 11 август куни Россия президенти Владимир Путин коронавирусга қарши биринчи вакцина рўйхатдан ўтказилганини маълум қилганди. У Гамалея номидаги институт томонидан яратилган. Путиннинг сўзларига кўра вакцина барқарор иммунитет шакллантиради ва барча зарур текширувлардан ўтган. Амалда эса Гамалея институти вакцинаси ишлаб чиқишнинг дастлабки босқичида турибди. Унда кенг миқёсли клиник текширувлар ўтказилмаган. Илмий журналларда эса синов натижалари ҳақида ҳеч қандай мақолалар йўқ.
Мавзуга доир:
Маълумот учун, АҚШда Moderna компанияси ишлаб чиқарган вакцина 30 минг кишида якуний синовдан ўтказилмоқда. Қозоғистонда эса 1 август куни COVID-19’га қарши биринчи эмлаш ўтказилган. Германияда коронавирус вакцинаси 2020 йил охирида фойдаланиш учун тасдиқланиши кутилмоқда
Изоҳ (0)