Филиппин Ички ишлар вазирлиги ва маҳаллий ўзини ўзи бошқариш идораси раҳбари Эдуардо Аньо яна бир бор коронавирусга чалинди. Амалдор шу йилнинг март ойида ҳам инфекция юқтириб олган эди, деб хабар беради «ТАСС».
Бунга қадар 58 ёшли Аньо даволаниш курсларини олган ва ундаги тест натижалари салбий чиққанди.
«Ўзимда грипп аломатларини сеза бошладим, жумладан, томоқда ва танада оғриқ… 15 август куни олган тестим натижаси менда яна коронавирус борлигини кўрсатди», — дейди вазир. У фуқароларни пандемиянинг нақадар жиддийлиги ва хавфли эканлигини тўғри тушунишга чақириб, доим ниқобда юриш ва қўлларни ювишни тавсия қилган.
Айни вақтда вазир шифокорлар назорати остида.
Сўнгги маълумотларга кўра, Филиппинда коронавирус билан касалланганлар сони 153 минг кишидан, COVID-19 қурбонлари сони эса 2,4 минг кишидан ошиб кетган.
Аввалроқ Косово бош вазири Авдула Хотида, Арманистон бош вазири Никол Пашинянда, Қозоғистон соғлиқни сақлаш вазири Елжан Биртановда, Бразилия президенти Жаир Болсонаруда, Қирғизистон соғлиқни сақлаш вазири Собиржон Абдикаримовда пневмония, унинг ўринбосари Нурбўлот Усенбаевада эса коронавирус аниқлангани ҳақида хабар берилган эди.
Эслатиб ўтамиз, март ойида Филиппин президенти Родриго Дутерте полиция ва қуроллари кучларга карантин вақтида тинчлик ва тартибни бузиб, норозилик намойишини ўтказаётган фуқароларга қарата ўқ узиш бўйича кўрсатма берган эди.
Изоҳ (0)