Telegram мессенжери 15 август куни Беларусдаги сайловлар борасида расмий каналини ишга туширди. Шу куннинг ўзида каналга «Беларусдаги президентлик сайловларида кимга овоз бердингиз?» номли аноним сўровнома жойлаштирилган.
Ушбу хабарни ёзиш вақтида унда Telegram’нинг 1,4 миллиондан ортиқ фойдаланувчиси иштирок этган. Сўров иштирокчиларининг 52 фоизи Светлана Тихановскаяга, 3 фоизи — Александр Лукашенко ҳамда 1 фоизга яқини Сергей Череченга овоз берган. Шунингдек, яна 3 фоиз иштирокчи барчасига қарши овоз берганини маълум қилган. Иштирокчиларнинг 7 фоизи Беларусда яшаса-да, сайловларга бормаганини маълум қилган. Сўровномадаги 35 фоиз иштирокчи беларуслик эмасликларини билдирган.
Номзодларга ўз овозини фақатгина Беларусь SIM картасига эга фойдаланувчилар бера олади. Кейинроқ Telegram вариантларнинг бир қисмига фақатгина беларуслик фойдаланувчилар овоз бера олишини тасдиқлаган.
Мавзуга доир:
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,08 фоиз овоз тўплаган. Мухолифат номзоди Светлана Тихановская эса расмий маълумотларга кўра, 10,09 фоиз овоз олган.
Натижалар эълон қилингач, Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
Изоҳ (0)