Япония бошқа ҳеч қачон урушларда қатнашмайди. Бу ҳақда мамлакат бош вазири Синдзо Абэ капитуляция (таслим бўлиш)нинг 75 йиллиги муносабати билан Токиода бўлиб ўтган маросимда маълум қилди.
«Ўтган уруш мамлакатимиздаги 3 миллион киши умрига зомин бўлди. Бугун, орадан 75 йил ўтиб тинчлик ва фаровонлигимиз уруш пайтида ҳалок бўлганларнинг қурбонликлари асосига қурилганини унутмаймиз. Бутун 75 йил давомида мамлакатимиз тинчлик йўлидан бормоқда. Уруш даҳшатлари бошқа қайтарилмаслиги учун берган ваъдамизда туришда давом этамиз», — деган у.
Ҳукумат раҳбари Иккинчи жаҳон урушида ҳалок бўлган барча японияликлар хотирасига ҳурмат бажо келтириб, мамлакат жаҳон ҳамжамияти билан турли муаммоларни ҳал этишга қаратилган ҳамкорликни давом эттиришга тайёрлигини таъкидлади.
Шундан сўнг маросимлар ўтказиладиган Ниппон Будокан залида бир дақиқалик сукут эълон қилинган. Кейин эса Япония императори Нарухито халққа мурожаат билан чиққан. У япон халқи қўлни қўлга бериб коронавирус пандемиясини ва у билан боғлиқ бўлган қийинчиликларни енгиб ўтишига ишонч билдирди. Шунингдек, «Мен чуқур пушаймонлик ҳисси билан урушда иштирок этиш бошқа ҳеч қачон такрорланмаслигини чин дилдан хоҳлайман», — деб айтган.
Япония 15 август куни мамлакат императори Хирохито Япониянинг Иккинчи жаҳон урушидан чиқиши, яъни мамлакат мағлуб бўлганини тан олганини эълон қилганига 75 йил тўлганини нишонламоқда. Бу йилги маросим коронавирус пандемияси туфайли қисқартирилган шаклда ўтказилмоқда. Залда 540 киши ташриф буюрган бўлиб, бу авваллари ўтказилган маросимда иштирок этувчилар сонининг тахминан ўндан биридир.
Изоҳ (0)