АҚШ Федерал захира тизими (ФЗТ) тақсимлаш реестрлари ва рақамли валюталарга боғлиқ тадқиқот ва тажрибаларни ўтказмоқда. Бу ҳақда ФЗТ бошқарув кенгаши аъзоси Лейл Брэйнардга таяниб, CoinDesk хабар берди.
Брейнарднинг аниқлик киритишича, гап рақамли долларни ишга тушириш ҳақида кетмаяпти. Бироқ CoinDesk’нинг таъкидлашича, унинг мулоҳазалари ФЗТнинг тажрибаларида сезиларли ютуқларга ишора қилмоқда.
Ички тадқиқотлардан ташқари Массачуссетс технологиялар институти билан ҳамкорликда Марказий банк томонидан (АҚШда бу вазифани Федерал захира тизими бажаради) фойдаланишга мўлжалланган гипотетик рақамли валюталарни яратиш ва синовдан ўтказиш устида ҳам иш олиб борилмоқда.
2020 йил бошида АҚШ ФЗТ ўзининг рақамли валютасини чиқариш имкониятини кўриб чиқишни бошлашини маълум қилганди. Хитой эса 2019 йил охиридан буён рақамли юанни чиқариш устида иш олиб бормоқда.
Эслатиб ўтамиз, АҚШ федерал захира тизими 28—29 апрель кунлари ўтказилган йиғилиш якунларига кўра йиллик 0-0,25 фоизлик база ставкасини сақлаб қолган эди.
Изоҳ (0)