БМТ бош котиби Беларусда сайловлардан кейин юзага келган можарони мулоқот орқали ҳал қилишга чақирди

БМТ бош котиби Антониу Гутерриш Беларусь халқи фуқаролик ҳуқуқлари, шу жумладан, тинч намойишлар ўтказиш ҳуқуқига риоя қилиш муҳимлигини маълум қилди. У зўравонликка қарши чиқди ва можарони мулоқот орқали ҳал қилишга чақирди.

«Ҳукумат намойишларга жавобан босиқликни сақлаши лозим. Қўлга олинганларга нисбатан зўравонликлар ва бошқа шафқатсизларча муносабатда бўлингани ҳақидаги хабарлар яхшилаб текширилиши керак. Бош котиб мамлакатда тинчликни сақлаш мақсадида беларусликларни сайловлардан кейин юзага келган муаммони мулоқот орқали ҳал қилишга чақирмоқда», — дейилади БМТ расмий вакили Стефан Жуаррикнинг 14 август куни эълон қилган баёнотида.

Эслатиб ўтамиз, Беларусда 9 август куни президент сайлови бўлиб ўтди. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифат номзоди Светлана Тихановская эса расмий маълумотларга кўра, 9,9 фоиз овоз олган.

Пойтахт Минскда президент сайловидан кейин норозилик намойиши бошланган. Беларусь милицияси сайлов участкалари олдида тўпланган одамларни қўлга олди. Намойишлар вақтида жами 6 700 киши полиция томонидан ҳибсга олинган. Уларнинг аксарияти 13 август соат 22:30 да озодликка чиққан бўлса, қолган қисми 14 август тонгида озодликка чиқиши хабар қилинган.

Кўпгина давлатлар, шу жумладан Европа Иттифоқи ва АҚШ сайлов жараёни ва мамлакатдаги зўравонликни қоралаган. Европа Иттифоқи ташқи ишлар вазирлари Беларусга нисбатан санкция қўллашни бир овоздан маъқуллаган. Вашингтон ҳам бундай имкониятни истисно этмаган.

Беларусь президенти Александр Лукашенко эса республикага қарши тажовуз бошланганини ҳамда норозилик намойишлари чет элдан уюштирилаётгани ва уларда «катта жиноий ўтмишга» эга одамлар иштирок этаётганини таъкидламоқда.